Bakıda keçiriləcək yunan-Roma güləşi üzrə dünya kuboku yarışının püşkü atılıb
Bakı, 8 oktyabr, AZƏRTAC
Noyabrın 5-6-da ölkəmizdə ilk dəfə yunan-Roma güləşi üzrə dünya kuboku yarışı keçiriləcək.
AZƏRTAC Azərbaycan Güləş Federasiyasına istinadla xəbər verir ki, Bakı İdman Sarayında təşkil olunacaq yarışda Serbiyada baş tutmuş son dünya çempionatında ilk “5-lik”də yer alan milli komandalarla yanaşı, dünya yığması (all star) iştirak edəcək. Dünya Güləş Birliyi tərəfindən püşkatma mərasimi keçirilib və 6 iştirakçı 2 qrupa bölünüb.
Azərbaycan millisi B qrupunda Serbiya və dünya yığması ilə mübarizə aparacaq. A qrupunda isə Türkiyə, İran və Qırğızıstan yer alıb.
Reqlamentə əsasən, noyabrın 5-də qrup mərhələsinin görüşləri baş tutacaq. Qruplarda 1-ci yeri tutan komandalar finala yüksələcək. İkinci pillədə qərarlaşan komandalar isə 3-cü yer uğrunda görüşə vəsiqə qazanacaqlar. Həlledici qarşılaşmalar noyabrın 6-da keçiriləcək.
Bölmənin digər xəbərləri
