BAKIDA KEÇİRİLƏN BEYNƏLXALQ KONFRANS BAŞA ÇATMIŞDIR
Tədbirin sonuncu günü konfrans geniş iclasda öz işini davam etdirmişdir. İclasa sədrlik edən BMT-nin Azərbaycandakı rezident əlaqələndiricisi Marko Borsotti “Gələcək istiqamətlər” mövzusunda çıxış etmiş, Milli Qeyri-Hökumət Təşkilatları Forumunun sədri Azay Quliyev və digər natiqlər mövzu ətrafında fikirlərini açıqlamış, suallara cavab vermiş, Azərbaycan hökumətinin və özəl sektorun mövqeyindən və görülən işlərdən ətraflı danışmışlar.
“Gələcək prioritetlər, strategiyalar və əməkdaşlıq formaları” mövzusu ilə bağlı “Dövlət imkansızlığının aradan qaldırılması proqramı”, “Yerli hökumət və İcma əsasında fəaliyyət göstərən təşkilatlar”, “Qaçqın və məcburi köçkünlər”, “İcmanın səfərbər olunması” bölmələri üzrə yaradılmış İşçi Qruplarının hesabatları dinlənilmişdir.
Müzakirələrdə ABŞ-ın “Mersi Kor” beynəlxalq humanitar təşkilatının və BMT-nin Qaçqınlar üzrə Ali Komissarlığının Azərbaycandakı nümayəndələri Vilyam Holbruk, Boqdan Nahaylo, BMT-nin ölkəmizdəki rezident əlaqələndiricisi Marko Borsotti, bp-nin sosial məsələlər üzrə meneceri Maykl Hakenbrux, Böyük Britaniyanın Middieseks Universiteti Biznes Məktəbinin əməkdaşı Maykl Hokins təmsil etdikləri qurumların mövqeyini açıqlamış, Azərbaycanda gələcək fəaliyyətin istiqamətlərindən danışmış, yerli hökumətlə beynəlxalq humanitar təşkilatların əlaqələrinin dərinləşməsi sahəsində mühüm işlərin görülməsinə dair yekun şərhlər söyləmişlər.
Onlar konfransın yüksək səviyyədə təşkilinə və keçirilməsinə yaradılan şəraitə görə minnətdarlıqlarını bildirmiş, belə tədbirlərin davam etdirilməsinin əhəmiyyətini xüsusi vurğulamışlar.
Azərbaycan Baş nazirinin müavini, Dövlətqaçqınkomun və Beynəlxalq Humanitar Yardım üzrə Respublika Komissiyasının sədri Əli Həsənov konfransda çıxış etmiş, beynəlxalq humanitar təşkilatların respublikamızdakı fəaliyyətini yüksək qiymətləndirmiş, onların əməkdaşlıq, tərəfdaşlıq, əlaqələndirmə işlərində daha fəal olmalarını arzulamışdır.
“Ermənistan-Azərbaycan, Dağlıq Qarabağ münaqişəsi sülh yolu ilə həll olunanadək beynəlxalq humanitar təşkilatlar Azərbaycandan getməməlidir” fikirini diqqətə çatdıran Əli Həsənov demişdir ki, birgə əməkdaşlıq sayəsində qazanılan təcrübədən gələcəkdə qaçqın və məcburi köçkünlərimiz doğma evlərinə qayıdandan sonra da istifadə olunacaqdır.
Hazırlanmış bir sıra proqramlar çərçivəsində humanitar yardımların həcminin artırılması barədə düşünməyin zəruriliyini söyləyən, son illər göstərilən köməyin azalmasını dünyanın digər bölgələrində yeni münaqişə ocaqlarının yaranması ilə izah edən Əli Həsənov vurğuladı ki, bu, donorların fəaliyyətinin zəifləməsinə səbəb olsa da, Azərbaycan hökuməti öz daxili imkanları, xüsusən də neft gəlirləri hesabına qaçqın və köçkünlərin problemlərinin həllini qismən öz üzərinə götürmüşdür.
O, hazırda Azərbaycanda Əfqanıstan, İran, Rusiya, İraq, Fələstin və digər ölkələrdən 11 min nəfərədək “qaçqın” statusu almaq niyyətində olan və sığınacaq axtaran şəxslərlə bağlı söylənilən fikirlərə münasibət bildirdi, bu sahədə lazımi işlərin görüldüyünü diqqətə çatdırdı, Prezident Heydər Əliyevin ölkəmizə rəhbərliyi dövründə görülən tədbirlərdən danışdı. Bildirildi ki, bunun nəticəsində mövcud çətinliklər tədricən aradan qaldırılmış, müvafiq qanunvericilik bazası yaradılmış, beynəlxalq, yerli humanitar təşkilatların fəaliyyətinin vahid mərkəzdən əlaqələndirilməsi təşkil edilmişdir. Azərbaycanda fəaliyyət göstərən çoxsaylı xarici və yerli qeyri-hökumət təşkilatlarına yaradılan şərait bunun bariz nümunəsidir.
Baş nazirin müavini Əli Həsənov ötən müddət ərzində çətin vəziyyətdə yaşayan məcburi köçkünlərə və qaçqınlara kömək etdikləri və davamlı inkişaf sahəsindəki səyləri üçün respublikamıza humanitar yardım göstərən donor ölkələrə, xarici ölkələrin neft şirkətlərinə və donor rolunu öz üzərinə götürməyə başlayan yerli şirkətlərə, eyni zamanda, konfransın təşkilatçılarına və sponsorlarına - BMT-nin Qaçqınlar üzrə Ali Komissarlığına, ABŞ-ın “Uşaqların xilası”, “MERSİ KOR” təşkilatlarına, Norveçin Qaçqınlar Şurasına və digər beynəlxalq humanitar təşkilatlara, bp, “Statoyl” və “Ekson-Mobil” şirkətlərinə və əməyi olan digər şəxslərə Azərbaycan hökuməti adından təşəkkürünü bildirdi.
Dövlətqaçqınkomun sədri sonda Azərbaycan Prezidentinin verdiyi tapşırıqların və göstərişlərin yerinə yetirilməsi üçün beynəlxalq təşkilatlarla sıx, uğurlu və faydalı əməkdaşlığın davam etdiriləcəyini diqqətə çatdırdı.
Yekun çıxışlarda konfransın işi müsbət qiymətləndirildi, Ermənistan-Azərbaycan, Dağlıq Qarabağ münaqişəsi sülh yolu ilə həll olunana, qaçqın və məcburi köçkünlər doğma yurdlarına qayıdanadək humanitar yardımların davam etdirilməsinin zəruriliyi təsdiqləndi. Azərbaycan Prezidenti İlham Əliyevin konfransda iştirakı və əhalinin bu təbəqəsinin sosial vəziyyətinin yaxşılaşdırılması istiqamətində atdığı addımlar bir daha yüksək dəyərləndirildi.
Bölmənin digər xəbərləri
