Bakıda “Potensial 2” dekorativ-tətbiqi sənət festivalı keçiriləcəkdir
Bakı, 3 noyabr (AZƏRTAC). Noyabrın 12-də Azərbaycan Respublikasının Prezidenti yanında Gənclər Fondunun maliyyə dəstəyi ilə “Arts Council Azerbaijan” (“Azərbaycan İncəsənət Konsulluğu”) qeyri-hökumət təşkilatının dekorativ-tətbiqi sənət bölməsi tərəfindən “Art Villa” qalereyasında “Potensial 2” dekorativ-tətbiqi sənət festivalı keçiriləcəkdir.
Təşkilatdan AZƏRTAC-a bildirmişlər ki, festivalda batika, qobelen, keramika, şəbəkə, zərgərlik, xalça növlərinə aid əsərlər nümayiş etdiriləcəkdir. Bununla yanaşı, festivalda Üzeyir Hacıbəyli adına Bakı Musiqi Akademiyasının tələbələrinin iştirakı da nəzərdə tutulmuşdur. Xalq musiqisi sədaları altında keçiriləcək festivalın məqsədi dekorativ-tətbiqi sənət növlərini təbliğ, gənc nəsildə maraq yaratmaqla bu milli sənət növlərinin inkişafına kömək, böyük potensiala malik yaradıcı insanları kəşf etməkdir. Adət-ənənələri qorumaq gənclərin əl işlərini nümayiş etdirmək üçün böyük imkan yaradır. Festival ölkənin dekorativ-tətbiqi sənət aləmində ənənəvi və məşhur bayrama çevriləcəkdir.
Layihənin kuratoru Aynur Əzizovadır.
“Arts Council Azerbaijan” qeyri-hökumət təşkilatının festivalı keçirməkdə əsas məqsədi gənc nəslin incəsənətə olan marağını daha da artırmaq, Azərbaycan sənətkarlarını tanımaq və tanıtdırmaqdır.
Bölmənin digər xəbərləri
