BAKIDA RUSİYALI HƏMVƏTƏNLƏRİN BEYNƏLXALQ ŞURASININ İCLASI KEÇİRİLİR
AZƏRTAC xəbər verir ki, sentyabrın 5-də mətbuat konfransında iclas iştirakçıları görülmüş işlərdən danışdılar. Azərbaycanın Rus İcmasının sədri, Milli Məclisin deputatı M.Zabelin dedi ki, iclasda Şuranın işini daha da təkmilləşdirmək, təşkilatı möhkəmlətmək, onun fəaliyyət sahələrini genişləndirmək, müxtəlif ölkələrdə nüfuzunu yüksəltmək, sıralarını artırmaq məsələlərinə baxılmışdır.
O vurğuladı ki, iclas Bakıda heç də təsadüfən keçirilmir. Azərbaycan paytaxtı öz beynəlmiləlçilik ənənələrinə sadiqdir və ən iri diasporlardan –170 min nəfəri birləşdirən rus icması bu ölkədədir. İclasın Azərbaycanda keçirilməsinin digər səbəbi RHBŞ-nin və Rəyasət heyətinin üzvlərini xalqımızın və onların həmvətənlərinin həyat və məişəti, ölkəmizin iqtisadi inkişafı və daha böyük yüksəlişinin perspektivləri ilə tanış etməklə bağlıdır.
Geniş iclasda RHBŞ Rəyasət heyətinin sədri qraf P.Şeremetyev, Rəyasət heyəti sədrinin birinci müavini knyaz N.Lobanov–Rostovski, Rusiya Dövlət Dumasının deputatı, MDB Ölkələri İnstitutunun direktoru K.Zatulin, RF XİN-in Xaricdəki Həmvətənlərlə İş üzrə Departamentinin direktoru A.Çepurin, İctimai Kitabxananın - “Xaricdəki Ruslar” Fondunun direktoru V.Moskvin və digər şəxslər iştirak edirlər.
Xatırladaq ki, RHBŞ rusiyalı həmvətənlərin dünyanın 38 ölkəsindəki 66 icmasını birləşdirir.
