Bakı, 6 sentyabr, Fidan Əlizadə, AZƏRTAC

Nizami Kino Mərkəzində mövzusu “Qadın haqları” olan ANİMAFİLM Beynəlxalq Animasiya Festivalının açılış mərasimi təşkil edilib.

AZƏRTAC xəbər verir ki, 2018-ci ildən etibarən hər il Mədəniyyət Nazirliyinin təşkilati dəstəyi ilə keçirilən festivalda əvvəlcə mədəniyyət nazirinin müavini Səadət Yusifova Azərbaycan kinosunun dünya kinematoqrafiyasının tərkib hissəsi olduğunu vurğulayaraq festivalın əhəmiyyətindən danışıb.

Festivalın bilet satışından əldə olunacaq gəlirin azərbaycanlı gənc qadın rejissorlara ianə ediləcəyini deyən nazir müavini deyib: "Bu sahənin inkişaf etdirilməsi və gələcək nəsillərə çatdırılması çox vacibdir. Hər kəsin uşaqlıq xatirəsi olan bir animasiya filmi var. Animasiya filminin adı gələndə və ya ona baxmaq imkanı olanda böyük nəsil sanki öz keçmişinə qayıdır. Animasiya sahəsinin digər özəlliyi ondan ibarətdir ki, ən kiçik yaşlı uşağı və ən böyük yaşlı insanı bir araya gətirə bilir. Bu baxımdan animasiyanın cəmiyyətdə rolu vacibdir. Bugünkü festivala ümumilikdə 46 ölkədən 174 film daxil olub. Müsabiqə proqramına 13 fərqli ölkədən 39 film seçilib. Hər il olduğu kimi, bu il də tamaşaçılar dünyanın müxtəlif ölkələrindən təqdim edilən onlarla müasir animasiya filmi ilə tanış olmaqla yanaşı, bu sahənin peşəkarları ilə fikir mübadiləsi apararaq, eləcə də müxtəlif ustad dərslərində iştirak etmək hüququ qazanıblar".

Eyni zamanda, qeyd olunub ki, festival çərçivəsində 20 tədbirin keçirilməsi və 60-dan çox animasiya filminin nümayişi nəzərdə tutulub. Festival müsabiqə, müsabiqədənkənar və peşəkar proqramlardan ibarətdir. Müsabiqə proqramına iki yerli və iki beynəlxalq kateqoriyalar, "Tamaşaçı rəğbəti mükafatı" daxildir. Müsabiqə qaliblərinin seçimi beynəlxalq münsiflər heyəti və uşaq tamaşaçılar tərəfindən həyata keçirilir.

Müsabiqədənkənar proqramda tematik nümayişlərin, festivalın mövzusuna uyğun filmlərin və retrospektivlərin, dünyada məşhur animasiya müəlliflərinin əsərlərinin nümayişləri nəzərdə tutulub. Peşəkar proqram isə xarici və yerli animasiya mütəxəssislərinin ustad dərsləri və vörkşoplardan ibarətdir. Peşəkar proqram çərçivəsində, həmçinin İsveçrə Əməkdaşlıq və İnkişaf Agentliyinin dəstəyi ilə “Women Rights Through Animated films” inkişaf vörkşopu və maliyyə proqramı təşkil olunacaq. Müsabiqə qaliblərinin seçimi 6 xarici mütəxəssisin də daxil olduğu beynəlxalq münsiflər heyəti tərəfindən həyata keçiriləcək.

Tədbirin davamında Azərbaycan Animasiya Assosiasiyasının həmtəsisçisi və İdarə Heyətinin üzvü Nəzrin Ağamalıyevanın rejissorluq etdiyi "Hədis" və beynəlxalq münsiflər heyətinin üzvü Isabelle Favezin “Hava poçtu” qısametrajlı animasiya filmləri nümayiş olunub.

Daha sonra İsveçrə Konfederasiyasının Azərbaycandakı səfirliyinin missiya rəhbərinin müavini, Beynəlxalq əməkdaşlıq şöbəsinin rəhbəri Alberto Hernandez, Niderland Krallığının Azərbaycandakı səfiri Pauline Eizema və festivalın xüsusi qonağı “Oskar” mükafatçısı niderlandlı rejissor Michael Dudok de Wit VI ANİMAFİLM Beynəlxalq Animasiya Festivalı haqqında fikirlərini bölüşərək burada iştiraklarından məmnunluqlarını bildiriblər.

Sonda niderlandlı rejissor Michael Dudok de Wit-in "Ata və qız" və gürcüstanlı rejissor Ana Chubinidzenin müsəlman aləmində demokratik yolla seçilmiş ilk müsəlman qadın deputat Pərixanım Sofiyeva haqqında eyniadlı animasiya filmi nümayiş etdirilib.

Festivalın beynəlxalq münsiflər heyətinə 6 xarici peşəkar daxildir: Isabelle Favez (İsveçrə), İsmayıl İman (Azərbaycan), Ana Chubinidze (Gürcüstan), Oktai İusibov (Azərbaycan, Finlandiya), Olivier Catherin (Fransa) və Tehzeeb Khurana (Hindistan).

Festivala Avropa və Asiyadan xüsusi qonaqlar - rejissorlar və animatorlar qatılıb: Məsud Pənahi (Azərbaycan, Almaniya), Kireet Khurana (Hindistan), Matthew Lyon (Kanada) və Michael Dudok de Wit (Niderland krallığı, Birləşmiş krallıq).