Banqladeşdə baş verən yanğında ölənlərin sayı 52-yə yüksəlib
Pekin, 9 iyul, AZƏRTAC
Banqladeşin Narayanqanc vilayətində qida məhsulları istehsal edən zavodda baş verən güclü yanğın nəticəsində ölənlərin sayı 52-yə yüksəlib.
AZƏRTAC yerli mediaya istinadla xəbər verir ki, iyulun 8-də axşam saatlarında baş verən bədbəxt yanğın bir sutkaya yaxın davam edib. Yanğın başlayandan sonra yeddimərtəbəli binanın yuxarı mərtəbələrində olan fəhlələr xilas olmaq üçün pəncərələrdən tullanıblar. Onlardan 3-ü ölüb, 50 nəfər isə müxtəlif dərəcədə xəsarət alıb. İyulun 9-da günorta saatlarında yanğın nəzarət altına alındıqdan sonra xilasedicilər daha 49 meyit tapıblar. Meyitlərin şəxsiyyəti müəyyənləşdirildikdən sonra ailələrinə təhvil veriləcək. Yanğınla mübarizəyə 26 briqada cəlb olunub. Hazırda binada axtarış işləri davam etdirilir.
Mütəxəssislər yanğın nəticəsində çox sayda insan tələfatının binada yanğın təhlükəsizliyinə əməl olunmaması ilə bağlı olduğunu bildirirlər.
Zavodda çalışanların ailə üzvləri doğmaları haqqında xəbər öyrənmək üçün əraziyə toplaşıblar. Hətta onlar ilə polis arasında kiçik qarşıdurma da qeydə alınıb. Hökumət ölənlərin ailələrinə kompensasiya veriləcəyini açıqlayıb.
Bölmənin digər xəbərləri
