Baş məşqçi R.Əbdürrəhmanov: “Birinci Avropa Oyunlarında üzgüçülərimizin final mərhələsinədək irəliləyəcəyinə ümid bəsləyirik”
Xaçmaz, 4 may, Elxan Yusifli, AZƏRTAC
Xəbər verdiyimiz kimi, Xaçmaz Olimpiya İdman Kompleksində 5 ölkədən 80-dən çox idmançının qatıldığı su idmanının üzgüçülük növü üzrə beynəlxalq turnir keçirilir.
Bu yarış həm də birinci Avropa Oyunlarına qatılacaq Azərbaycan üzgüçüləri üçün növbəti sınaq meydanıdır.
Üzgüçülük üzrə Azərbaycan yığmasının baş məşqçisi Rəşad Əbdürrəhmanov AZƏRTAC-a eksklüziv müsahibəsində Xaçmazda keçirilən beynəlxalq yarış, üzgüçülərimizin birinci Avropa Oyunlarına hazırlıq prosesi və idmançılarımızın bu mötəbər yarışda şansları haqqında fikirlərini bölüşüb.
-Artıq birinci Avropa Oyunlarının başlanmasına az qalıb. Üzgüçülük üzrə yığma komandamızın mötəbər turnirə hazırlığı necə keçir?
-Birinci Avropa Oyunlarına hazırlıq çərçivəsində mart ayının sonlarından başlayaraq aprelin 15-dək Slovakiyanın Bаnskа Bistritsа şəhərində təlim-məşq toplanışında olduq. Orada keçirilən üzgüçülük üzrə lisenziya xarakterli beynəlxalq turnirdə idmançılarımız yaxşı nəticələr göstərdilər. Belə ki, üzgüçülərimizdən Boris Kirilov 50 və 100 metr məsafədə arxası üstə üzmə üsulunda qızıl medala, 200 metr məsafədə arxası üstə üzmə üsulunda isə gümüş medala sahib olub. Bundan başqa, birinci Avropa Oyunlarında Azərbaycanı təmsil edəcək milli komandamızın üzvü Qriqori Kalinski isə 100 metr məsafədə arxası üstə üzmə üsulunda bürünc medala layiq görülüb. Bununla yanaşı, milli komandamızın xanım üzgüçüləri arasında Yulya Stitsyuk 100 metr məsafədə arxası üstə üzmə üsulunda, Alsu Bayramova isə 200 metr batterflay üsulu ilə üzmədə bürünc medallara sahib olublar.
Slovakiyada təlim-məşq toplanışı başa çatdıqdan sonra üzgüçülərimiz Çexiyanın Ostrava şəhərində təşkil olunan lisenziya xarakterli beynəlxalq turnirdə də iştirak etdilər. Bu turnirdə də 3 medal qazandıq. Ümumilikdə, təlim-məşq toplanışlarımız çox yüksək səviyyədə keçdi. Bizim hazırlaşmağımız üçün hər bir şərait yaradılıb. İştirak etdiyimiz yarışlar idmançılarımızın nəticələrinin daha da yaxşılaşmasına kömək olacaq. Birinci Avropa Oyunlarına çox az vaxt qalıb. Bu müddətdən də səmərəli istifadə edib ölkəmizdə keçiriləcək mötəbər turnirdə yaxşı nəticələr göstərməyə çalışacağıq.
-Hazırda Xaçmaz Olimpiya İdman Kompleksində 5 ölkənin idmançılarının qatıldığı üzgüçülük üzrə beynəlxalq turnirdə iştirak edirsiniz. Bu turnir¬ birinci Avropa Oyunları ərəfəsində üzgüçülərimiz üçün növbəti sınaq ola bilərmi?
- Biz ümummilli lider Heydər Əliyevin xatirəsinə həsr olunmuş bu yarışa həmişə yüksək səviyyədə hazırlaşmışıq və çox məsuliyyətlə yanaşırıq. Sevindirici haldır ki, son illər Azərbaycanın regionlarında yüksək səviyyəli yarışlar keçirilməsi ənənə halı alıb. Xaçmaz Olimpiya İdman Kompleksində üzgüçülük üzrə beynəlxalq yarışın yüksək səviyyədə təşkili regionlarımızda idmanın inkişafından xəbər verir. Bu, həm də buradakı uşaq və gənclərin su idmanı növlərinə marağının artmasına səbəb olacaq. Beş ölkədən 80-dən çox idmançının qatıldığı bu beynəlxalq yarış birinci Avropa Oyunlarına hazırlıq çərçivəsində böyük əhəmiyyətə malikdir. İdmançılarımızın qatıldığı hər bir turnir üzgüçülərimizin təcrübəsinin artmasına kömək edir.
-Üzgüçülərimizin birinci Avropa Oyunlarında şanslarını necə qiymətləndirirsiniz?
-Komandamızın heyəti gənclərdən və yeniyetmələrdən təşkil olunub. Təxminən bir ildir ki, kollektivimizlə mütəmadi məşqlər keçiririk. Milli komandamızda çox perspektivli idmançılar yer alıb. Birinci Avropa Oyunlarında 12 üzgüçü ilə təmsil olunacağıq. Bunlardan 6-sı oğlan, 6-sı isə qızdır. Bu mötəbər turnirdə üzgüçülərimizin final mərhələsinədək irəliləyəcəyinə ümid bəsləyirik. Final mərhələsinə düşmək artıq bütün Avropada səkkiz idmançıdan biri olmaq deməkdir. Bu da bizim üçün böyük nəticə sayıla bilər. Hər bir halda həmvətənlərimizi sevindirməyə çalışacağıq.
Bölmənin digər xəbərləri
