Baş nazir: Nəqliyyat dəhlizlərinə tələbat sürətlə artır
Tbilisi, 25 iyun, AZƏRTAC
Nəqliyyat dəhlizlərinə tələbat sürətlə artır. İndi bizim vəzifəmiz bu tələbə cavab verməkdir və məhz buna görə də ölkənin nəqliyyat şəbəkəsini tam modernləşdirməyə davam etdiririk.
AZƏRTAC xəbər verir ki, bu sözləri Gürcüstanın Baş naziri İrakli Kobaxidze Poti limanında yeni körpünün tikintisinin başlanması mərasimindəki çıxışında bildirib.
“Biz ölkənin nəqliyyat şəbəkəsinin tam modernləşdirilməsini davam etdiririk - limanları genişləndiririk, Anakliya dərin su limanını tikirik, dəmir yollarını və avtomobil magistrallarını təkmilləşdiririk. Bugünkü layihə bu strateji vizyonun ayrılmaz hissəsidir. Son illərdə Orta Dəhliz Avropa ilə Asiya arasında ən etibarlı və rəqabətli marşrutlardan biri kimi ortaya çıxıb. Bu ilin ilk beş ayında Gürcüstan limanlarında yük dövriyyəsi 21 faiz artıb. Yeni Poti dəniz limanına gəldikdə isə, burada yük dövriyyəsi son üç ildə 78 faiz artıb. Bu rəqəmlər nəqliyyat dəhlizlərinə tələbatın çox sürətlə artdığını açıq şəkildə göstərir”, - deyə İ.Kobaxidze vurğulayıb.
Bölmənin digər xəbərləri
