Bayram tətili günlərində Şəkiyə gələn əcnəbi turistlər arasında ruslar üstünlük təşkil edir VİDEO
Şəki, 23 mart, Mustafa Dadaşov, AZƏRTAC
Azərbaycanın ən qədim şəhərlərindən və mədəniyyət mərkəzlərindən olan Şəki ilin bütün fəsillərində turistləri özünə cəlb edir. Hər il olduğu kimi, bu il də Novruz tətili günlərində Şəkiyə gələn turistlərin sayında xeyli artım var. Turistlərin ən çox üz tutduqları tarixi məkanlardan biri “Yuxarı Baş” Dövlət Tarix-Memarlıq Qoruğudur. Burada yerləşən muzey və karvansaraylar, həmçinin XVIII əsrə aid dünya əhəmiyyətli nadir tarixi-memarlıq abidəsi - Şəki xanlarının sarayı yerli və xarici turistlərin daha çox marağına səbəb olur.
Qoruğun direktoru Təranə Abdullayeva AZƏRTAC-ın bölgə müxbirinə bildirib ki, Novruz tətili günlərində şəhərin qonaqlarının əksəriyyətini yerli turistlər, həmçinin müxtəlif turizm turlarının iştirakçıları təşkil edir. Əcnəbi turistlər Şəkiyə əsasən yay və payız aylarında gəlməyə üstünlük verirlər. Həmin aylarda bu şəhərdə bir sıra beynəlxalq tədbirlər, festivallar keçirilir.
Onun sözlərinə görə, builki bayram tətili günlərində Şəkiyə gələn əcnəbi turistlər arasında ruslar üstünlük təşkil edir. Bayram günlərində şəhərə turist axınını nəzərə alaraq, qoruğun ərazisindəki bütün muzeylərin, o cümlədən Xan sarayının qapıları səhər saatlarından axşamadək qonaqların üzünə açıq olur. Turistlərə xidmət göstərmək üçün Şəki xanları sarayının yaxınlığında, qədim qala divarları ilə əhatələnən geniş yaşıllıq ərazidə asudə vaxt və istirahət guşəsi yaradılıb. Turistlər burada quraşdırılan çadırlarda dincələ, milli geyimdə foto çəkdirə, Şəki şirniyyatları ilə samovar çayına qonaq ola bilərlər. Uşaqlar da yaddan çıxmayıb, ərazidə onlar üçün müxtəlif attraksionlar quraşdırılıb. Turistlərin asudə vaxtlarının maraqlı keçməsi üçün hər gün qoruğun ərazisindəki tarixi abidələrin önündə konsert proqramları təşkil olunur.
Turistlərə göstərilən xidmətlər barədə məlumat verən Təranə Abdullayeva deyib: “Xarici turistlərlə ünsiyyət qurmaqda heç bir çətinlik yoxdur. Bütün bələdçilər üç-dörd, bəziləri isə altı-yeddi xarici dildə sərbəst danışırlar. Bu mövsümdən başlayaraq turistlərə bir neçə yeni xidmət növü də təklif olunur. Yenicə fəaliyyətə başlayan səyyar bələdçilər turistlərin arzusuna uyğun olaraq, onları şəhərin görməli yerləri, tarixi məkanları ilə tanış edir, otellər, restoranlar barədə məlumat verirlər. Xan yaylağına gəzintilərin təşkili də turistlərin böyük marağına səbəb olur.
Yelena Lebedeva Azərbaycana Moskvadan qonaq gəlib. İxtisasca həkimdir. Bu, onun ölkəmizə ikinci səfəridir. Təəssüratlarını AZƏRTAC-ın bölgə müxbiri ilə bölüşən rusiyalı turist deyib: “Şəki məni, yaxşı mənada təəccübləndirdi. Buranın çox füsunkar təbiəti, gözəl havası, qonaqpərvər sakinləri var. İnsanların üzündəki xoş təbəssüm, bayram əhval-ruhiyyəsi məni heyran etdi. Bizi çox yaxşı qarşıladılar. Azərbaycana Novruz bayramı günlərində səfər etməyim heç də təsadüfi deyil. İstəyirəm ki, adət-ənənələrinizlə daha yaxından tanış olam”.
Rusiyalı qonaq bildirib ki, Azərbaycanda qədim ənənələr, mədəni dəyərlərlə müasirlik vəhdət təşkil edir: “İnsanların tarixi keçmişinə belə hörmətlə yanaşması çox xoşuma gəlir. Ölkənizdə turizm sürətlə inkişaf edir. Müasir infrastruktur, Moskva, eləcə də dünyanın bir çox şəhərləri ilə etibarlı hava nəqliyyatı əlaqəsinin olması, müasir avtomobil yolları, keyfiyyətli rabitə xidmətləri turistlərin ölkənizə marağını artırıb. Bir sözlə, indi Azərbaycana gəlmək daha da asanlaşıb. Turistlər üçün yaradılmış bu şəraitdən çox razıyıq”.
Bölmənin digər xəbərləri
