Bazel-Lend: İsveçrənin yaşıl məkanı
Bakı, 2 avqust, AZƏRTAC
Bazel İsveçrənin Sürixdən qatarla 50 dəqiqəlik məsafədə yerləşən şəhəridir. Kiçik sahəsi və əla ictimai nəqliyyat şəbəkəsi sayəsində şəhər ətrafında gediş-gəliş tez və asandır. Beləliklə, mərkəzdən yola düşdükdən cəmi 20 dəqiqə sonra Bazel-Lendə - toxunulmamış təbii peyzajı, kəndlərlə əhatə olunmuş mənzərəsi və qala xarabalıqları olan Bazel bölgəsinə çata bilərsiniz. Burada siz sükunətdən və quşların nəğməsindən həzz ala, zərif meşəlik təpələrdə gəzintiyə çıxa və yerli ləzzətli nemətlərdən dadmaq olar.
“Öküz oteli” və Arlesheim Təbii Ermitajı
İsveçrənin şimal-qərbindəki Bazel bölgəsi demək olar ki, toxunulmamış təbiəti, Yura dağ silsiləsinin yaxınlığındakı mənzərəsi ilə məşhurdur. Bu səbəbdən, Bazel-Lend xüsusilə velosipedçilər və piyadalar tərəfindən sevilir. Bölgədə bir çox müxtəlif yaşayış məntəqələri, o cümlədən bu yerlərin əsas şəhəri Liestal, habelə Arlesheim, Valdenburq və başqaları var. Bazelə ən yaxın olan Arlesheim, rəsmi olaraq 2024-cü ildə İsveçrənin ən gözəl qəsəbələrindən biri kimi tanınıb. Bu yaşayış məntəqəsi, həmçinin Bazel-Lend kantonunun bir hissəsi olan eyniadlı rayonun mərkəzidir.
Şəhər tramvayı Bazelin mərkəzindən Arlesheimə aparan 9 kilometrlik məsafəni cəmi 20 dəqiqəyə qət edir. Platformanı arxada qoyduqdan sonra dərhal özünüzü sükunətin bürüdüyü, quşların cəh-cəhini və bulaqlarda suyun şırıltısını eşitdiyiniz başqa bir dünyada tapırsınız. Dayanacaqdan 5 dəqiqəlik məsafədə qeyri-adi “Gasthof zum Ochsen” (“öküz oteli”) adlı mehmanxanaya rast gəlirik. Buraya çatdıqda, bu məkanın niyə belə adlandırıldığı məlum olur. Otelin sahibi olan ailənin ət istehsalı biznesi var. Hər yeni gələn qonağı öz otağında otelin yanında yerləşən şirkət mağazasından məhsullar şəklində sürpriz gözləyir. Bizi toyuq çubuqlarına, yəni ədviyyatlı kolbasa kimi bir məhsula qonaq etdilər.
Otellə üzbəüz yerləşən Arlesheim bələdiyyəsinin Təbiəti Mühafizə Komissiyası müxtəlif otların, dərman və bağ bitkilərinin bitdiyi qeyri-adi bağ yaradıb. Ancaq Arlesheim ziyarətçilərini İsveçrənin Ermitaj adlanan ən böyük İngilis Landşaftı Parkında əsl təbiət möcüzəsi gözləyir. Ermitaj sözünün mənası “tənha yer” deməkdir. Həqiqətən 1785-ci ildə yaradılmış, süni gölməçələri və çayları, dəyirmanları və körpüləri olan bu park təbiətin qoynunda sakit gəzintilər üçün mükəmməl ərazidir. Bu yerin insan tərəfindən yaradıldığını bilməyənlər onun təbiət qoruğu olduğunu düşünə bilərlər. Üstəlik, parkın bir tərəfi qədim qayalara bitişikdir, digər tərəfdən isə sıx dağ meşələri ilə hasarlanıb. Arlesheim mərkəzindən parka gedən yol boyunca buğda tarlaları, bağlar və yerli sakinlərin evləri görünür. Bundan əlavə, dolama yollar sizi sıx bir meşə qurşağından keçirir və ayaqlarınızın altında böyük bir göl axır. Su anbarının səthi çiçəkli su zanbaqları ilə örtülüb və suda iri sazanlar yaşayır. Taxta platforma gölməçənin səthi ilə sürüşən süsənbər və su cırtdanlarına heyranlıqla tamaşa etmək üçün suyun kənarına daha çox yaxınlaşmağa imkan verir.
Lakin Ermitajın əsas cazibəsi qayalıqda yerləşən Birsek qəsridir. Ona çatmaq uzaqdan göründüyü qədər çətin deyil. 1243-cü ildə yerli şahzadə tərəfindən tikilmiş bu qəsr 1365-ci ildə zəlzələ nəticəsində zərər görüb, daha sonra sahibləri tərəfindən barokko üslubunda yenidən tikilib və 1793-cü il inqilabı zamanı demək olar ki, təkrarən dağıdılıb. O vaxtdan bəri onun xarabalıqları Ermitaj mənzərəli bağı bəzəyir. Qəsrə may ayından sentyabrın sonuna kimi çərşənbə və bazar günləri daxil ola bilərsiniz, digər günlərdə isə binaya ancaq çöldən tamaşa etmək mümkündür. Qeyd edək ki, Ermitaj Landşaft Parkı Bazel-Lend kantonunun qorunan təbiət əraziləri siyahısına daxildir və bütün ilboyu ziyarətçilər üçün açıqdır.
Vasserfallen kanat yolu və Auqust Raurik Amfiteatrı
Birsek Bazel-Lenddəkı yeganə qəsr deyil. Bölgədə 80-dən çox başqa qəsr, saray və tarixi xarabalıqlar var. Bazel-Lend mehmanxanalarının hər hansı birində gecələyən qonaqlar Bazel bölgəsində ictimai nəqliyyatdan pulsuz istifadə etməyə imkan verən “Guest Pass+” çeki əldə edirlər. Onu aldıqda sonra siz özünüzü yalnız bir sahə ilə məhdudlaşdırmadan ərazidə sərbəst hərəkət edə bilərsiniz.
Məsələn, Bazel-Lendin açıq havasında ekskursiyalar, idman proqramları və ya rahat gəzintilər üçün ideal yer hesab edilən Vasserfallen bölgəsinə gedin. Arlesheimdən Vasserfallenə qədər olan məsafə təxminən 25 kilometrdir. Bazel-Lendin yeganə kanat yolu, Vasservalenbahn burada yerləşir və sizi yaxınlıqdakı dağın zirvəsinə aparır. Arzu edənlər icarəyə götürdüyü skuterlərlə geri qayıda bilərlər.
Arlesheimdən Bazel-Lend kantonunun paytaxtı Liestala da gedə bilərsiniz. Buradakı Köhnə şəhərin küçələri mağazalar, kafelər və restoranlarla doludur. Qədim dövrlərdə bu şəhərin yerində Roma dövrünə aid Auqust Raurik qəsəbəsi var idi. Oradakı amfiteatr, fəvvarəli ev və digər qədim abidələr tarixi irs nümunəsidir. Orta əsrlərdən burada yerləşən heyranedici palıd bağı - Vildenstein qəsri günümüzədək qorunub saxlanılıb. Daha müasir bir məkana getmək istəyirsinizsə, İsveçrənin ən böyük su parkı Aquabasilea sizin üçün uyğundur.
Bazel-Lend kantonunun ən müasir hissəsində - Laufen bölgəsində Yura dağ silsiləsinin heyrətamiz mənzərələrini - mağaraları, günəş terraslarını, otlaqlar və bağlar ilə birlikdə qayalar vadisi Laufenthalı görə bilərsiniz. Kiçik bir ərazidə çoxlu sayda karst və mağara birləşməsi var. Tematik yol boyunca 10-dan çox məlumat lövhəsi mağaraların həssas ekosistemi, onların formalaşması və sakinləri haqqında məlumat verir. İsveçrənin ən böyük qayalıq abidə kolleksiyasına sahib olan və 150 ilə 200 milyon il arasında tarixə malik 2000-dən çox eksponatla Laufen Fosil Muzeyində yerli təbiət haqqında daha çox məlumat əldə edə bilərsiniz.
Bölmənin digər xəbərləri
