BDYPİ hərəkət iştirakçılarını diqqətli olmağa çağırıb
Bakı, 6 sentyabr, AZƏRTAC
Baş Dövlət Yol Polisi İdarəsi həftəsonları paytaxtdan bölgələrə gedən avtomobil axınının artması ilə əlaqədar sürücülərə müraciət edib.
İdarədən AZƏRTAC-a bildirilib ki, müraciətdə magistral və əsas yollarda hərəkət intensivliyinin yüksəlməsi qəza ehtimalını artırdığı və bu səbəbdən sürücülərin daha diqqətli, məsuliyyətli davranmasının vacibliyi qeyd olunur.
Bildirilir ki, yola çıxmazdan əvvəl nəqliyyat vasitəsinin texniki sazlığı, xüsusilə təkərlərin, işıq cihazlarının və əyləc sisteminin vəziyyəti mütləq yoxlanılmalıdır. Eyni zamanda, sürət həddinə əməl edilməsi, sükan arxasına yorğun və yuxusuz halda əyləşməmək, uzun məsafələrdə isə fasilələrlə istirahət etmək təhlükəsizliyin əsas şərtlərindəndir.
Baş Dövlət Yol Polisi İdarəsi bir daha diqqətə çatdırır ki, yol hərəkəti qaydalarına əməl olunmaması inzibati məsuliyyət yaratmaqla yanaşı, insan həyatının itirilməsi ilə nəticələnən ağır faciələrə də səbəb olur.
Bölmənin digər xəbərləri
