Bəhreynli ekspert: Azərbaycan iqlim, dini yaxınlıq və qonaqpərvərlik baxımından cəlbedicidir
Astana, 3 iyun, AZƏRTAC
Azərbaycan ilə Bəhreyn arasında xüsusilə turizm sahəsində ikitərəfli əlaqələrin dinamik inkişafı müşahidə olunur.
Bu sözləri AZƏRTAC-a bəhreynli ekspert Nabil Əbdülrəhman Əl-Asumi deyib.
O qeyd edib: “Hazırda Bəhreyndən Bakıya birbaşa aviareys var və ölkəmizdən Azərbaycana çoxlu turist gəlir. Xalqları birləşdirən ortaq din, əlverişli iqlim və Azərbaycan xalqının bəhreynli turistlərə qarşı qonaqpərvər münasibəti ölkəni xüsusilə cəlbedici edir. Bundan başqa, gəliş zamanı sadələşdirilmiş viza proseduru səyahəti xeyli asanlaşdırır”.
Bəhreynli ekspert, həmçinin Azərbaycanın yaşıl enerji və ətraf mühitin mühafizəsi sahəsində dövlət siyasətinin əhəmiyyətini qeyd edib. O, ötən il BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasına (COP29) ev sahibliyi edən Bakının rolunu xüsusilə vurğulayıb: “Azərbaycanın qlobal yaşıl enerji gündəliyinə verdiyi töhfə hörmətə layiqdir. İqlim dəyişikliyi siyasətçilərdən tutmuş adi vətəndaşlara qədər bütün bəşəriyyəti narahat edir. Biz Bəhreyndə Azərbaycanın ətraf mühitin qorunması üzrə səylərini yüksək qiymətləndirir və dəstəkləyirik”.
AZƏRTAC-ın xüsusi müxbiri
Astana
Bölmənin digər xəbərləri
