Belarusda faşizm üzərində qələbədə Azərbaycanın rolundan bəhs edən kitabın təqdimatı keçirilib
Kiyev, 3 iyul, AZƏRTAC
Belarusun Vileyka şəhərinin faşizm işğalından azad edilməsi münasibətilə iki dəfə Sovet İttifaqı Qəhrəmanı general-mayor Həzi Aslanovun abidəsi önündə tədbir keçirilib.
AZƏRTAC xəbər verir ki, tədbirdə “Vileika Diyarşünaslıq” Muzeyinin direktoru Olqa Şlyapo şəhərin faşist işğalçılarından azad edilməsi tarixinə nəzər salaraq deyib: “1944-cü il iyulun 2-də Vileyka işğaldan azad edilib. Həmin əməliyyatı Tank Qoşunlarının qvardiya general-mayoru Sovet İttifaqı Qəhrəmanı Həzi Aslanovun komandanlığı ilə 35-ci Qvardiya Tank Briqadası həyata keçirib. Qırmızı Ordu əsgərlərinə Sovet İttifaqı Qəhrəmanı Georgi Pokrovskinin komandanlığı altında Vasili Voronyanski adına Xalq Qisasçılar Briqadasının partizanları kömək ediblər. Azərbaycan xalqının şanlı oğlu Həzi Aslanov iki dəfə Sovet İttifaqı Qəhrəmanı adına layiq görülüb, adı tarixə düşüb, göstərdiyi şücaətlər bir çox kitablarda qeyd olunub, xatirəsi şəhərimizdə əbədiləşdirilib. Vileykada bir küçə onun adını daşıyır. 2009-cu ildə Belarusun azad edilməsinin 65 illiyi şərəfinə abidəsi ucaldılıb.
Sevinirik ki, Azərbaycan xalqı da bu xatirəni qoruyub saxlayır. Keçmiş qələbələrimiz bu gün və gələcəkdə ölkələrimiz arasında dostluğun bünövrəsidir”.
Tədbirdə Maksim Tank adına Belarus Dövlət Universitetinin Azərbaycan Dili və Mədəniyyəti Mərkəzinin rəhbəri Fuad İbrahimov çıxış edərək faşizm üzərində qələbədə Azərbaycan xalqının rolundan danışıb: “Bu, Azərbaycan və Belarus xalqının da tarixi yaddaşıdır. Biz fəxr edirik ki, xalqımızın igid oğulları Belarus torpaqlarının da azadlığı uğurunda böyük şücaət göstəriblər”.
Sonra tədbir iştirakçıları iki dəfə Sovet İttifaqı Qəhrəmanı Həzi Aslanovun abidəsi önünə gül dəstələri qoyaraq, onun xatirəsini ehtiramla yad ediblər.
Daha sonra “Vileyka Diyarşünaslıq” Muzeyinin sərgi salonunda Diaspor Fəaliyyətinə Jurnalistlərin Dəstəyi İctimai Birliyinin sədri, araşdırmaçı-jurnalist Fuad Hüseynzadənin “Böyük Qələbənin varisləri” kitabının təqdimat mərasimi keçirilib.
Tədbiri muzeyin elmi işçisi Olqa Kolosova açaraq Vileyka şəhərinin azad edilməsində Həzi Aslanovun xidmətlərindən danışıb və kitabda da bu haqda geniş məlumat verildiyini bildirib.
Belarus-Azərbaycan İcmaları Konqresinin təşkilatçılığı ilə keçirilən təqdimat zamanı Fuad Hüseynzadə öncə 3 İyul - Belarusun Müstəqillik Günü münasibəti ilə hər kəsi təbrik edib.
Kitabın İkinci Dünya müharibəsində Qələbənin 80 illiyinə həsr olunduğunu deyən müəllif nəşrin ilk növbədə beynəlxalq auditoriyaya ünvanlandığını bildirib: “Kitabda Azərbaycanın Qələbəyə verdiyi töhfə, xalqın ictimai-siyasi, iqtisadi və hərbi sahələrdə iştirakı, eləcə də ata və babaları İkinci Dünya müharibəsində döyüşmüş xaricdə yaşayan azərbaycanlıların qəhrəmanlıqları təfərrüatı ilə təhlil edilib. 44 günlük Vətən müharibəsində Azərbaycanın ərazi bütövlüyünün bərpasında iştirak etmiş yeni nəslin nümayəndələrinə də xüsusi yer ayrılıb”.
Vileyka Rayon İcraiyyə Komitəsinin sədri Anatoli Zavatski İkinci Dünya müharibəsi illərində Azərbaycan əsgərlərinin Belarus torpağında göstərdikləri qəhrəmanlıqların xatirələrdə yaşadığını bildirib: “Vileyka şəhəri bu müharibənin mühüm xatirə yerlərindən biridir. 1944-cü il iyulun 1-2-də Vileyka şəhərini faşist işğalçılarından azad edən iki dəfə Sovet İttifaqı Qəhrəmanı general-mayor Həzi Aslanovun şücaəti xüsusilə təqdirəlayiqdir. Bu qəhrəmanlığın xatirəsi xalqlarımız arasında dostluq və həmrəyliyin möhkəmlənməsinə xidmət edir”.
Belarus-Azərbaycan İcmaları Konqresinin Qrodno şəhəri üzrə nümayəndəliyinin sədri Elxan Bəylərov, Bobruvski şəhəri üzrə nümayəndəliyinin sədri Raman Quqasari, İdarə Heyətinin üzvləri Soltan Hacıyev, Elman Mahmudov və başqaları çıxış edərək Vileykada Azərbaycanın qəhrəman oğlu Həzi Aslanovun göstərdiyi şücaətin diqqətdə saxlanmasından məmnunluqlarını ifadə ediblər.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
