Belçika artan hibrid təhdidlərin hədəfindədir
Paris, 13 noyabr, AZƏRTAC
Belçika son aylarda müəyyən şəkildə mərkəzə çevrilmiş hibrid təhdidlərlə üz-üzədir.
AZƏRTAC xəbər verir ki, bu barədə Belçika federal parlamentinin müdafiə komissiyası qarşısında yeni strateji müdafiə vizyonu ilə bağlı dinləmələrdə Baş Qərargah rəisi, Hərbi Hava Qüvvələri generalı Frederik Vansina açıqlama verib.
AZƏRTAC xəbər verir ki, o, ölkədə son vaxtlar müşahidə edilən insidentlərin – hava limanları və hərbi bazalar üzərində qanunsuz dron uçuşları, kiberhücumlar, Şimal dənizində şübhəli gəmi fəaliyyətləri və sosial şəbəkələrdə aqressiv ritorikanın Belçikanın hibrid əməliyyatların hədəfi olmasını göstərdiyini deyib.
Generalın sözlərinə görə, bu tip hibrid fəaliyyətlər təkcə Belçikada deyil, Danimarka, Almaniya və Niderland kimi digər Avropa ölkələrində də müşahidə olunur. O, sualtı kabel sabotajları, kiberhücumlar və dezinformasiya kampaniyalarını Rusiyanın mümkün müdaxiləsinə misal kimi göstərib. O qeyd edib ki, pilotsuz uçuş aparatlarına qarşı müdafiə sistemi (Counter Unmanned Aerial Systems (C-UAS)) artıq müdafiənin radarında mövcud idi. Müdafiə naziri Teo Frankenin istəyi ilə hazırlanan təcili plan isə bu strategiyanın sadəcə sürətləndirilməsidir. Hazırda bu sistemlərin operativ şəkildə tətbiqi üzərində iş aparılır və proses bir neçə ay davam edəcək.
General hərbi zonalarda qaydaların daha sərt olduğunu təsdiqləyib. “Hərbi ərazilərdə dronları məhv etmək mümkündür. Bu çətindir, xüsusilə gecə və uyğun vasitələr olmadan, amma qaydalar mövcuddur. Əsas məqsəd mülki zonalarda ziyana yol verməməkdir. Mülki zonalarda, məsələn, hava limanlarında vəziyyət daha mürəkkəbdir. Hava nəqliyyatına nəzarət qurumu “Skeyes” dronlara qarşı siqnalların yayılmasını təhlükəsizlik baxımından qadağan edir, çünki bu, mülki təyyarələrə təsir göstərə bilər. Bu səbəbdən hökumət yeni qaydaların hazırlanması üçün araşdırmalar aparır”, - deyə o bildirib. General, həmçinin beynəlxalq vəziyyətə toxunaraq bildirib ki, II Dünya müharibəsindən bəri mövcud olan qlobal nizam hazırda dağıntıya uğrayır. Heç nə göstərmir ki, Rusiya Prezidenti Vladimir Putin yaxın zamanda Ukraynada müharibəni dayandıracaq.
F.Vansina Ukrayna müharibəsinin texnoloji reallığı dəyişdirdiyini deyib. O, yalnız 2025-ci ildə Ukraynanın cəbhədə 4 milyon pilotsuz uçuş aparatından istifadə etdiyini vurğulayıb və qeyd edib ki, bu, yalnız başlanğıcdır. Dronlar getdikcə daha çox süni intellektlə idarə olunacaq.
Baş Qərargah rəisi Avropa müdafiə sənayesinin praktik olaraq sağ qalmaq uğrunda mübarizə apardığını deyib. O hesab edir ki, prosedurlar çox ləngiyir və hökuməti, eləcə də maliyyə qurumlarını satınalma proseslərini sürətləndirməyə çağırıb.
General yekunda vurğulayıb ki, yeni qəbul edilən strateji plan Belçikanın müdafiəsinin yenidən qurulmasını gücləndirəcək. 2016-cı ildən başlayan modernləşmə əvvəlki hökumət dövründə uğurla davam edib və 2026–2034 dövrünü əhatə edən yeni strateji plan orduya böyük investisiyaları nəzərdə tutur.
Belçika, hibrid təhlükələrin artdığı bir dövrdə müdafiəsini gücləndirməyə çalışır və qarşıdakı aylar bu istiqamətdə həlledici olacaq.
Bölmənin digər xəbərləri
