Belçika Federal Parlamentinin deputatı Deid Gert: Ermənistan Dağlıq Qarabağdan geri çəkilməlidir
Bakı, 1 noyabr (AZƏRTAC). Belçika Federal Parlamentinin deputatı Deid Gert Avropa Azərbaycan Cəmiyyətinin (TEAS) Ermənistan-Azərbaycan, Dağlıq Qarabağ münaqişəsinə dair suallarını cavablandırarkən bəyan etmişdir ki, heç kəs beynəlxalq ictimaiyyətin 1993-cü ildə Azərbaycanın ərazi toxunulmazlığı ilə bağlı BMT Təhlükəsizlik Şurasının məlum qətnamələri vasitəsilə göndərdiyi aydın ismarıcı inkar edə bilməz. Yaxşı olardı ki, Ermənistan öz silahlı qüvvələrini Azərbaycanın işğal altındakı ərazilərindən geri çəksin. Bununla da Dağlıq Qarabağın 20 ildən artıq davam edən işğalına son qoyular və sülh prosesinin sürətlənməsində tərəqqi əldə olunardı.
Avropa Azərbaycan Cəmiyyətindən AZƏRTAC-a bildirmişlər ki, Deid Gert sözünə davam edərək demişdir: “Dağlıq Qarabağ münaqişəsinin həllindən danışarkən, ilk növbədə məcburi köçkünlərin qeyd-şərtsiz öz evlərinə qayıtması məsələsə vacib şərt kimi nəzərə alınmalıdır. Bununla paralel olaraq, repatriasiya prosesindən sonra əhalinin yaşayış şəraitinin yaxşılaşdırılması üçün həmin bölgələrə zəruri sərmayələr yatırılmalıdır.
Heç şübhəsiz ki, Azərbaycan ilə Avropa arasında artan qarşılıqlı əlaqələr Azərbaycanın ərazi bütövlüyü məsələsinin siyasi gündəmə gətirilməsi üçün əlavə fürsət yaradır.
Şübhəsiz, ATƏT-in Minsk qrupu vasitəsilə aparılan danışıqlar tərəqqidən çox uzaqdır. Zənnimcə, Minsk qrupunun bəzi üzvləri bu danışıqların əsl mahiyyəti haqqında çox məhdud baxışa malikdirlər”.
Bölmənin digər xəbərləri
