Bərdədə 20 Yanvar şəhidlərinin xatirəsi yad edilmişdir
Bərdə, 20 yanvar (AZƏRTAC). 20 Yanvar faciəsinin 22-ci ildönümü Bərdə rayonunda da Ümumxalq Hüzn Günü kimi qeyd edilmişdir. Faciənin ildönümü ərəfəsində bütün idarə və təşkilatlarda, Heydər Əliyev Muzeyində, təhsil və mədəniyyət müəssisələrində konfranslar, yığıncaqlar təşkil edilmiş, yanvarın 19-da məktəblərdə faciə ilə bağlı dərslər keçilmişdir.
AZƏRTAC xəbər verir ki, yanvarın 20-də Bərdə şəhərində şəhidlərin xatirəsinə ucaldılmış abidə kompleksi qarşısında ümumrayon anma mərasimi keçirilmişdir. Qəhrəman oğul və qızlarımızın xatirəsi bir dəqiqəlik sükutla yad edilmiş, onların müqəddəs ruhuna dualar oxunmuşdur.
Sonra mərasim rayon mədəniyyət evində davam etdirilmişdir. Tədbirdə rayon icra hakimiyyəti başçısının müavini, YAP rayon təşkilatının sədri Fəqət Şadlinskaya çıxış edərək 22 il əvvəl sovet ordusu tərəfindən törədilmiş faciənin dəhşətlərindən danışmış, qanlı hadisəni Azərbaycan xalqının azadlıq mübarizəsinin və qəhrəmanlıq salnaməsinin parlaq səhifəsi adlandırmışdır.
Tədbirdə məktəblilərin hazırladığı ədəbi-bədii kompozisiya nümayiş olunmuş, “Cavad xan” filmi göstərilmişdir.
Bölmənin digər xəbərləri
