Bəşəriyyəti qorumaq əlləri təmiz saxlamaqdan başlayır
Bakı, 13 aprel, AZƏRTAC
Çoxdan idi ki, əl mövzusu məni düşündürürdü. Bir cüt əl insan həyatında son dərəcə həlledici rol oynayır. Bəşəriyyətin konoravirus pandemiyasına qarşı mübarizə apardığı son günlərdə də yenə də infeksiyanın yayılmaması üçün ilk növbədə əllər gündəmə gətirilir: əlləri yuyun, əlləri dezinfeksiya edin, əlləri təmiz saxlayın, əllə toxunmayın və s. Bütün bu duyğuların ifadəsi kimi əllər haqqında poema üzərində işləyirəm.
Ötən ayın 21-dən Mərdəkandakı bağ evinə köçən şair, Əməkdar mədəniyyət işçisi Vaqif Bəhmənli AZƏRTAC-ın müxbiri ilə telefonla danışırkən özünün karantin dövründəki qayğılarından söz açıb: “Həyat yoldaşım Rəhilə ilə 20 gündən artıqdır ki, bağdayıq. Əslində, mənim indiki həyatımı iki yerə bölmək olar: bağın içində və çölündə. Günün çox hissəsini bağ-bağçaya qulluqla keçir: ağac əkir, dibini belləyir, gövdəsini ağardır, gül-çiçək becəririk. Son günlər burada o qədər səliqə-sahman və abadlıq işi görmüşük ki, bağ gülüstanı xatırladır. Karantin başlayana qədər nəvələrim də burada idi. Həyətdə onlarla domino və nərd oynayırdıq. Bağda nəvələrimin arasında yer belləmək, gülləri suvarmaq yarışı keçirirdik. İndi hərəsi öz evinə gedib, öz təhsillərini onlayn olaraq davam edirlər. 8 yaşlı nəvəmiz Səfurə Bülbül adına musiqi məktəbində fortepiano bölümündə təhsil alır. Qardaşı, 10 yaşlı İsgəndər İncəsənət gimnaziyasının şagirdidir. Gözəl rəsmlər çəkir, bir çox müsabiqələrin qalibidir, əsərləri dünyanın bir çox ölkəsində uşaq rəsmləri sərgisinə göndərilir. Qohum-qardaşla, dostlarla da telefon əlaqəsi saxlayırıq. Kiçik qızım Gülgün İzmirdə təhsilin başa vursa da, məlum səbəblərdən geri qayıda bilmir. Onunla gündə bir neçə dəfə danışıb hal-əhval tuturuq. Nigaranlığımız bir az onunla əlaqədardır”.
Şair bağda iş-gücdən yorulanda kitab oxumaqla məşğul olur: “Şəxsi kitabxanamda 16 mindən artıq kitab var. Yaranmış fürsətdən istifadə edin onları səliqə-sahmana saldım, bölmələr üzrə qruplaşdırdım. Mənə lazım olan kitabların çoxu elə şəxsi kitabxanamdadır. Son günlər Vasili Qriqoryeviç Yanın “Çingizxan”, Patrik Züskindin “Ətriyyatçı”, Paulo Koelyonun “Kimyagər” romanlarını oxumuşam. Dünya ədəbiyyatının digər seçmə nümunələrini vaxt olduqca mütaliə edirəm. Yaradıcılıq mətbəximdə isə çoxlu yazılarım var”.
Pandemiya dövründə küçəyə-bacaya çıxmadığını, çörəyi də evdə bişirdiklərini söyləyən şair deyib: “Yazıçı üçün evdə oturmaq qətiyyən çətin deyil, bəlkə də onun arzuladığı bir şəraitdir. Ancaq əgər bayıra çıxmaq təhlükə mənbəyidirsə, sənin küçədə olmağın kim üçünsə narahatlıq yardırsa, özün evə gələndə narahat olursansa, onda çıxmağın nə mənası var? Ən yaxşısı evdə oturub qayda-qanunlara əməl etmək, cəmiyyəti qlobal təhlükənin fəsadlarından qorumaqdır. Hesab edirəm ki, bəşəriyyətin başı üstünü alan fəlakətin qarşısını məhz bu yolla ala və sağlamlığımızı qoruya bilərik”.
Bölmənin digər xəbərləri
