Beşinci “Yüksəliş” müsabiqəsinin qalibi: Qiymətləndiricilər kifayət qədər peşəkardırlar
Bakı, 3 iyul, AZƏRTAC
“Yüksəliş” müsabiqəsinin qalibi olmaq istəyirsinizsə, ilk növbədə, mentorlardan nə istədiyinizi bilməlisiniz. Onlardan nə gözlədiyinizi dəqiq müəyyənləşdirin. “Yüksəliş” hər qapını aça bilməz, lakin onun imkanları və sərhədləri həqiqətən çox genişdir. Sadəcə olaraq nə istədiyinizi bilin və bunu mentorlarınızdan istəyin. Bu məsələyə xüsusi diqqət yetirin. İstəklərinizi onlarla açıq şəkildə bölüşsəniz, kifayət qədər dəstək ala biləcəksiniz.
AZƏRTAC xəbər verir ki, bunu beşinci “Yüksəliş” müsabiqəsinin qaliblərindən biri olan Toğrul Xəlilov yarımfinal mərhələsində çıxış edərkən söyləyib.
“Yarımfinal və final mərhələsində sizə nə kömək edə bilər? Əvvəlcə bir məqama toxunum. Yəqin ki, müxtəlif “mif”lər eşitmisiniz. Məsələn, bu il hansısa sahənin mütəxəssislərinə üstünlük veriləcəyi, dövlət orqanlarından və ya şirkətlərdən müəyyən sayda qalib seçiləcəyi, təhsilə xüsusi önəm verildiyi, qadın-kişi nisbətinin nəzərə alındığı və sair fikirlər səslənir. Bu kimi söhbətlərə əhəmiyyət verməyin. “Yüksəliş” müsabiqəsinin və qiymətləndirmə prosesinin ədalətli olduğuna inanın. Misal üçün, hər il bu “mif”lərdən iki-üçünün üzərindən öz təcrübəmdə xətt çəkmişəm. Biz eyni təşkilatdan qalib olmuşuq. Hətta iki həmkar eyni departamentdə müavin vəzifəsində çalışırdıq və hər ikimiz qalib olduq.
Universitet təhsilinə gəldikdə isə, mən hamının düşündüyü kimi yüksək göstəricilərə malik deyildim. Diplomumdakı orta bal da elə yüksək deyildi. Hətta 20 il əvvəl qəbul imtahanında 300 baldan az nəticə toplamışdım. Amma bu, “Yüksəliş” müsabiqəsində qalib olmağıma mane olmadı. Ona görə də diqqətinizi yalnız özünüzə yönəldin. Sizin keçmişiniz, müxtəlif rəqəmlər və göstəricilər həlledici deyil. Bu gün sizi qalib edə biləcək əsas amillər sizin dəyərləriniz, şəxsi keyfiyyətləriniz, ünsiyyət bacarıqlarınız, liderlik xüsusiyyətləriniz, idarəetmə bacarıqlarınız və digər fəaliyyətlərinizdir. Diqqətinizi bunlara yönəldin. Süni davranışlar və oynanılmış rollar sizi qələbəyə apara bilməz. Hətta təsadüfən qələbəyə aparsa belə, sonradan uğurlu olma ehtimalınız çox aşağı olacaq. Çünki qiymətləndiricilər kifayət qədər peşəkardırlar və səmimiyyəti qeyri-səmimilikdən, təbiiliyi sünilikdən ayırmağı bacarırlar. Əgər siz öz xarakteriniz, şəxsiyyətiniz və ruhunuzla qalib olursunuzsa, bu o deməkdir ki, məhz bu kimliyinizlə “Yüksəliş” müsabiqəsində uğur qazanmağa qadirsiniz. Deməli, doğru yoldasınız və bundan sonra sadəcə özünüzü inkişaf etdirməyə davam etməyiniz kifayət edəcək ki, daha böyük uğurlar qazanasınız. Əksinə, əgər süni cavablarınız və qeyri-səmimi davranışlarınızla qalib olsanız, onda sual yaranır: bundan sonra nə qədər bu rolu davam etdirə biləcəksiniz? Nə vaxta qədər bu obrazı qoruyub saxlamaq mümkün olacaq?”, - deyə Toğrul Xəlilov qeyd edib.
Bölmənin digər xəbərləri
