Bəstəkar: Azərbaycan romanslarını gənc ifaçılar üçün daha əlçatan etməyi hədəfləyirik
Bakı, 21 aprel, AZƏRTAC
Bu layihə mənim üçün xüsusi əhəmiyyət daşıyır. Eyni zamanda, bu iş vokal silsilənin başlanğıcıdır. Artıq bu proqramla Laçında çıxış etmişəm, daha sonra isə Muğam Mərkəzində keçirilən yaradıcılıq gecəmdə romanslar proqramın əsas hissəsini təşkil edib. “Gedim, bir az ağlayım” romansı ilk dəfə məhz Laçında səsləndirilib və tamaşaçılar tərəfindən böyük maraqla qarşılanıb. Layihə çərçivəsində təqdim olunan romansların sözləri Leyla Əliyeva tərəfindən qələmə alınıb.
Bu sözləri AZƏRTAC-a açıqlamasında bəstəkar Sevda Rəhimova bildirib.
O qeyd edib ki, layihənin əsas məqsədi Azərbaycan romanslarının inkişafına töhfə verməkdir. “İstəyirik ki, bu əsərlər silsilə halını alsın, notlaşdırılsın və gələcəkdə çap olunaraq gənc ifaçılar üçün əlçatan olsun. Bu, həm də böyük bəstəkar Asəf Zeynallının qoyduğu ənənənin davamı kimi qiymətləndirilə bilər”, – deyə Sevda Rəhimova vurğulayıb.
Layihənin ideyasının yaranmasından danışan bəstəkar bildirib ki, romans üçün söz axtarışı zamanı “Gedim, bir az ağlayım” şeirinə müraciət edib: “Həmin sözlər məni dərindən təsirləndirdi və bu mətn əsasında romans yazmaq qərarına gəldim. Beləliklə, gecənin konsepsiyası – poeziya ilə vokalın vəhdəti üzərində quruldu”.
Bölmənin digər xəbərləri
