Beyləqan pambıqçılarının hədəfi məhsul istehsalına görə respublika üzrə ön sırada yer almaqdır
Beyləqan, 29 may, Tahir Ağaməmmədov, AZƏRTAC
Ölkəmizdə aqrar sektorun ənənəvi sahəsi olan pambıqçılığın inkişafına göstərilən dövlət qayğısı Beyləqan rayonunda torpaq sahiblərinin bu sahəyə marağını ildən-ilə artırır. Ötən il 9560 hektar sahədə pambıq becərib, 21,9 min ton məhsul istehsal edən Beyləqan pambıqçıları bu il məhsuldarlıq göstəricisini daha da yüksəltməyi qarşılarına məqsəd qoyublar. Rayonun iqlim şəraiti, sakinlərin pambıqçılıq sahəsində təcrübəsi məhsul istehsalını artırmaq üçün stimul yaradır.
Beyləqan Rayon Dövlət Aqrar İnkişaf Mərkəzinin direktoru Xaliq Məmmədov AZƏRTAC-ın bölgə müxbirinə bildirib ki, bu il rayonda 9706 hektarda çiyid səpini həyata keçirilib. Pambıq sahələrinin 5268 hektarı “MKT İstehsalat Kommersiya” MMC, 3358 hektarı “Azərpambıq” MMC, 1000 hektarı “P-Aqro” MMC və 80 hektarı “Vuqar Aqro” ilə bağlanan müqavilə əsasında əkilib. Sahələrə göstərilən düzgün aqrotexniki tədbirlər nəticəsində yaxşı bitiş alınıb. Pambıqçılıqla məşğul olan fermerlər hazırda becərmə işlərini uğurla davam etdirirlər. Tarlalarda kultivasiya və seyrəltmə işləri aparılır, yemləmə gübrəsi verilir, zərərvericilərə qarşı dərmanlama tədbirləri görülür. Bağlanan müqaviləyə əsasən, pambıq istehsalçıları lazımi texnika, toxum, gübrə və kimyəvi preparatlarla tam təmin edilirlər. Beyləqanlı “ağ qızıl” ustaları təsərrüfat ilini uğurla başa vurmaq, strateji məhsulun tədarükündə respublikanın qabaqcılları sırasında durmağı hədəfləyiblər.
Ötən il bir hektar pambıq becərib 3 ton 800 kiloqram məhsul götürən fermer Lətif Zeynalov bu il məhsuldarlığı yüksəltməyi qarşıya məqsəd qoyub: “Pambıqçılıq gəlirli sahədir. Lakin yaxşı gəlir götürmək üçün əkin sahələrində aqrotexniki tədbirləri düzgün, vaxtında və ardıcıl həyata keçirmək, yüksək məhsuldarlıq əldə etmək lazımdır. Odur ki, becərmə işlərini lazımi qaydada yerinə yetiririk. Bu il iki hektarda pambıq becərirəm. Çalışacağıq ki, hər hektardan orta hesabla 40-45 sentner məhsul götürək”.
Məhsuldarlığı yüksəlmək üçün sahibkarlar Beyləqan Regional Aqrar Elm və İnnovasiya Mərkəzinin təcrübəsindən də yararlanırlar. Mərkəzin mütəxəssis və aqronomları yerlərdə sahibkarlarla görüş keçirib aqrotexniki qaydaları izah edir və əyani şəkildə göstərirlər. Bunun üçün 30 hektar sahədə yerli növ pambıq becərirlər. Məqsəd alim-fermer münasibətlərinin tənzimlənməsi, elmin yeni nailiyyətlərinin fermerlərə çatdırılmasıdır.
Beyləqan Regional Aqrar Elm və İnnovasiya Mərkəzinin direktor müavini Sədi İsmayılov bildirib ki, fermerlər konkret mövzular üzərində təlimə dəvət edilirlər. Onları maraqlandıran suallar ətrafında mövzular tərtib olunur, təlimlər keçirilir. Sahə nümayişləri təşkil edilir, fərdi məsləhətlər verilir. Əsas məqsəd yerli pambıq sortlarını inkişaf etdirmək və fermerlərin ondan bəhrələnməsinə nail olmaqdır.
Bu il ilk dəfə olaraq Beyləqan rayonunun Mil Təcrübə Stansiyasında pambığın innovativ texnologiya ilə becərilməsi həyata keçirilir. Pambıq ənənəvi becərmədən fərqli olaraq, tirəyə əkin üsulu ilə becərilir, damcı suvarma sistemi ilə suvarılır. Pambığın becərilməsində innovativ aqrotexniki tədbirlər görülür. Məqsəd yeni texnologiyanı tətbiq etməklə pambığın məhsuldarlığını yüksəltməkdir. Ərazidə Türkiyədən gətirilmiş, həmçinin yerli pambıq sortları müasir texnologiyanın tətbiqi ilə becərilir və sınağı aparılır. Yeni texnologiyanın tətbiq edildiyi nümunəvi tarlanın hər hektarından orta hesabla 50 sentnerdən yuxarı pambıq istehsal ediləcəyi gözlənilir. Bölgə üçün müəyyənləşən məhsuldar pambıq sortları seçilərək, toxumları emal ediləcək, qablaşdırılıb əkin üçün fermerlərə veriləcək. Gələcəkdə innovativ texnologiya fermer təsərrüfatlarında da tətbiq ediləcək. Bu isə pambığın məhsuldarlığını daha da yüksəltməyə imkan verəcək.
Bölmənin digər xəbərləri
