BEYNƏLXALQ TƏLİM-SEMİNAR BAŞA ÇATMIŞDIR
AZƏRTAC xəbər verir ki, Bakıda Azərbaycan Respublikasının Konstitusiya Məhkəməsinin Avropa Şurasının Venesiya Komissiyası ilə birgə təşkil etdiyi “Fərdi şikayətlərin öyrənilməsinin üsulları” mövzusunda iki günlük seminar fevralın 27-də başa çatmışdır.
Seminarın ikinci iclasında Azərbaycan Konstitusiya Məhkəməsinin hakimləri Ələddin Sultanovun və Rafael Qvaladzenin sədrliyi ilə “Qərar layihələrinin tərtib edilməsi və işin mərhələləri”, “İşlərə baxılma: Fərdi şikayət institutu və yeni yaranmış Konstitusiya Məhkəməsinə bəzi məsləhətlər” mövzuları ətrafında müzakirələr aparılmışdır.
Sloveniya Konstitusiya Məhkəməsinin beynəlxalq əlaqələr şöbəsinin müdiri Arne Mavçiçin “Sloveniya Konstitusiya Məhkəməsinin təcrübəsi”, Belçika Arbitraj Məhkəməsinin katibi Rik Rikboerin “Belçika Arbitraj Məhkəməsinin təcrübəsi”, Slovakiya Konstitusiya Məhkəməsinin hakimi Yan Kluçkanın “Slovakiya Konstitusiya Məhkəməsinin təcrübəsi”, Latviya Konstitusiya Məhkəməsi sədrinin müşaviri xanım Dzintra Pededzenin “Fərdi şikayət institutunun Latviyanın Konstitusiya Məhkəməsi tərəfindən tətbiq edilməsinin nəticələri” mövzularında məruzələri dinlənilmişdir.
Sonda təlim-seminarın iştirakçıları Konstitusiya Məhkəmələrində işlərə baxılmasına dair əlavə şərhlər vermiş, bir sıra Avropa dövlətlərinin məhkəmələrində fərdi şikayətlərə baxılması təcrübəsinin və üsullarının öyrənilməsi ilə bağlı fikirlərini açıqlamışlar.
Bölmənin digər xəbərləri
