Beynəlxalq Türk Akademiyası Pakistanla ortaq layihələrin icrasına başlayır
Nur-Sultan, 25 dekabr, AZƏRTAC
Beynəlxalq Türk Akademiyasının (BTA) prezidenti Darxan Kıdırəlinin rəhbərlik etdiyi nümayəndə heyəti Pakistan İslam Respublikasında səfərdə olub. Səfər çərçivəsində Darxan Kıdırəli bir sıra ikitərəfli rəsmi görüşlər keçirib, qərargahı Pakistanda yerləşən beynəlxalq təşkilatların rəhbərləri ilə müzakirələr aparıb və Əl-Fərabi Qlobal Forumuna qatılıb.
AZƏRTAC xəbər verir ki, Akademiya rəhbəri İslamabadda Pakistan İslam Respublikasının elm və texnologiya naziri Favad Husain Çaudari, eyni zamanda, federal təhsil və peşə təhsili nazirinin birinci müavini Fərah Hamid Xan ilə görüşüb. Görüşlərdə tarix və mədəniyyət sahələrində Türk dünyası ilə Pakistanı ortaqlaşdıran birgə tədqiqat layihələrinin həyata keçirilməsi, görkəmli xadimlərin irsinin öyrənilməsi və təbliği ilə bağlı fikir mübadiləsi aparılıb, əməkdaşlığın dərinləşdirilməsi üçün tədbirlərin təşkili barədə razılığa gəlinib. Pakistan tərəfi BTA çərçivəsində Türk dünyası ilə elmi, texnoloji əməkdaşlıqda maraqlı olduğunu bildirib.
Pakistan İslam Respublikasının xarici işlər nazirinin birinci müavini Sohail Mahmudla görüşdə tərəflər qarşılıqlı elmi əməkdaşlığın gücləndirilməsi məsələlərini müzakirə ediblər. Nazir müavini Akademiyanın fəaliyyəti ilə maraqlanıb və Əl-Farabi Qlobal Forumunun işini yüksək qiymətləndirib. D.Kıdırəli BTA-nın fəaliyyət istiqamətləri, həyata keçirdiyi layihələr və Pakistanla əməkdaşlıq planları barədə məlumat verib, Akademiyanın nüfuzlu pakistanlı mütəfəkkir Məhəmməd İqbalın Azərbaycan dilində yenicə çap etdirdiyi “İslamda dini düşüncənin rekonstruksiyası” kitabını və digər nəşrləri qarşı tərəfə təqdim edib.
Bununla yanaşı, İslam Əməkdaşlıq Təşkilatının (İƏT) qərargahı İslamabadda yerləşən Elm və Texnoloji Əməkdaşlıq Daimi Komitəsinin (COMSTECH) direktoru Məhəmməd İqbal Çaudari, İqtisadi Əməkdaşlıq Təşkilatının (ECO) Elm Fondunun prezidenti Manzur Hüseyn Sumro ilə görüşlər keçirilib, həmin beynəlxalq təşkilatlarla əməkdaşlığın inkişafı məsələləri müzakirə olunub. BTA ilə COMSTECH arasında Əməkdaşlıq Memorandumu imzalanıb.
Səfər çərçivəsində D.Kıdırəli böyük mütəfəkkir Əl-Farabinin anadan olmasının 1150 illiyi münasibətilə İslamabadda İslam Əməkdaşlıq Təşkilatı Elm və Texnoloji Əməkdaşlıq Daimi Komitəsinin (COMSTECH) və Qazaxıstan hökumətinin təşkilatçılığı ilə keçirilən Farabi Qlobal Forumuna qatılıb.
Forumun açılış mərasimində çıxış edən Pakistan Prezidenti Arif Alvi Əl-Fərabini bütün İslam dünyasının böyük şəxsiyyəti olduğunu, ortaq mənəvi mirasımız olan belə şəxsiyyətlərin irsinin daha əhatəli araşdırılmasının vacibliyini bildirib. Arif Alvi Türk Akademiyasının bu istiqamətdə fəaliyyətini yüksək qiymətləndirib və buna görə minnətdarlığını ifadə edib.
D.Kıdırəli Forumda təbrik nitqi söyləyib və Fərabi ilində təşkilatın həyata keçirdiyi layihələr barədə danışıb. Eyni zamanda, türkdilli dövlətlərlə yüksək səviyyəli münasibətlərə xüsusi həssaslıqla yanaşdığı üçün Pakistan tərəfinə təşəkkürlərini çatdırıb.
Səfər çərçivəsində BTA ilə Pakistanın İslamabad və Kəraçi şəhərlərindəki iki ən qabaqcıl universitet arasında əməkdaşlıq protokolları imzalanıb.
Həmçinin türkdilli dövlətlərin Pakistandakı diplomatik nümayəndəliklərində görüşlər təşkil olunub. Azərbaycanın İslamabaddakı səfiri Əli Əlizadə ilə görüşdə tərəflər türkdilli ölkələri arasında əməkdaşlığın inkişaf perspektivləri və gələcək layihələr barədə fikir mübadiləsi aparıblar. Səfir Akademiyanın Pakistanda ortaq irsimizin tədqiqi üçün həyata keçirməyi planlaşdırdığı layihələrə Azərbaycan tərəfinin hər zaman dəstək göstərməyə hazır olduğunu bildirib.
Səfər çərçivəsində BTA-nın nümayəndə heyəti Pakistanın mənəvi paytaxtı Lahorda Baburlar dövrünə aid tarixi abidələri də ziyarət edib.
İlahə Əhmədova
AZƏRTAC-ın xüsusi müxbiri
Nur-Sultan
Bölmənin digər xəbərləri
