ELM VƏ TƏHSİL
Beynəlxalq Türk Akademiyası Tonyukuk abidəsinin 1300 illiyinə həsr edilmiş onlayn konfransa başlayıb
Bakı, 24 aprel, AZƏRTAC
Aprelin 24-də Beynəlxalq Türk Akademiyası, qədim türk sivilizasiyasının və yazı mədəniyyətinin əsas abidələrindən biri, UNESCO-nun 2020-ci il yubileylər siyahısına salınan Tonyukuk abidəsinin 1300 illiyinə həsr edilmiş Beynəlxalq onlayn konfransa başlayıb.
AZƏRTAC xəbər verir ki, dünyanın müxtəlif ölkələrindən bir sıra aparıcı mütəxəssislərin, türkoloqların qatıldığı elmi tədbir qədim türk tarixinin tədqiqinə, Böyük Çölün mədəni-mənəvi mirasının beynəlxalq səviyyədə tanıdılmasına öz töhfəsini verir. Tədbirin onlayn formatda keçirilməsi bir tərəfdən COVID-19 pandemiyası ilə əlaqədar olsa da, digər tərəfdən, mövcud böhran şəraitində elmi-humanitar əməkdaşlığın aktuallığını nümayiş etdirməyi hədəfləyir.
Konfransa Amerika, Monqolustan, Macarıstan, Rusiya, Qırğızıstan, Azərbaycandan olan böyük türkoloqlar və Beynəlxalq Türk mərkəzlərinin rəhbərləri onlayn qatılıblar. Türk Akademiyasının prezidenti, Doktor Darhan Kıdıralı ilk sözü Türkiyənin UNESCO-dakı daimi nümayəndəsi Altay Cengizerə verib. O, bu çətin müddətdə Akademiyanın türklərdən bizə miras qalan Tonyukuk abidəsinin 1300 illiyinə həsr edilmiş konfransı keçirməsini Türk dünyası birliyinə atılmış mühüm bir addım kimi qiymətləndirib. Qeyd edib ki, bütün türk dövlətləri ilk olaraq Beynəlxalq Türk Akademiyasının təşkilatçılığı altında birləşməlidir. Türk dünyasının ortaq dəyərlərə malik olmasından söz açan UNESCO katibi Altay Cengizer Azərbaycanın gördüyü işlərə böyük önəm verib. O deyib ki, Parisdə dünyanın ən böyük mədəniyyət mərkəzi Azərbaycana məxsusdur.
“Ortaq gələcək qurmaq üçün Parisdəki Azərbaycan evi bütün türk ölkələrinin məkanı olmalıdır. Bütün Türk dünyası tədbirlərinin bu məkanda keçirilməsi məqsədəuyğundur. Ötən il Azərbaycan burada gözəl bir fotosərgi açıb. Bu sərgidən ilhamlanaraq, mən Səmərqənd, Buxara üçün belə foto sərgilər açılmasının əhəmiyyətli olduğunu deyirəm. Əgər Tonyukuk bu gün sağ olsaydı, bizə daha da sıx birləşin deyərdi. Mən inanıram ki, bizim türk dövlətlərinin başçıları da onun öyüdünə əməl edərdilər. Biz Tonyukukun yolundan bu yana nələri itirdik? Tez- tez bu sualı özümüzə verməliyik. Biz hər şeydən əvvəl dövlətlərarası təhlükəsizliyimizi qorumalıyıq. Mən UNESCO-da keçirilməsi planlaşdırılan “Böyük Çöl Sivilizasiyası: Tonyukuk İrsi və Çağdaş Türk Dünyası” adlı konfransa hansı tövsiyələrimi verərdim? Belə fikirləşirəm ki, Türk dünyasının dağları haqqında UNESCO-da davamlı tədbirlər keçirməliyik. Dünyada dağları bizdən başqa öyən, dərdini dağa deyən ikinci bir toplum yoxdur. Türk mədəniyyətində dağların xüsusi yeri var. Mən belə fikirləşirəm ki, biz burada Türk dünyasının dağları adlı sərgi keçirməliyik. Bu təqdimatı elə Parisdəki Azərbaycan evində keçirsək, çox gözəl olar”, - deyə A.Cengizer vurğulayıb.