Biləsuvarda 20 Yanvar faciəsi qurbanlarının xatirəsi anılmışdır
Biləsuvar, 20 yanvar (AZƏRTAC). Yanvarın 20-də Biləsuvar şəhərindəki “Şəhidlər” abidə kompleksinin önündə qanlı 20 Yanvar faciəsi qurbanlarının xatirəsi anılmışdır.
AZƏRTAC xəbər verir ki, Biləsuvar Rayon İcra Hakimiyyətinin başçısı Mahir Quliyev, idarə, müəssisə və təşkilatların rəhbərləri, müharibə veteranları, gənclərin və ictimaiyyətin nümayəndələri, şəhər əhalisi abidə kompleksinin, ölkəmizin suverenliyi və ərazi bütövlüyü uğrunda şəhid olanların məzarları önünə əklillər və gül dəstələri düzmüşlər. Burada şəhidlərin ruhuna dualar oxunmuşdur.
Tədbir rayon mədəniyyət evində davam etmişdir.
Mərasim iştirakçıları mədəniyyət evinin foyesində 20 Yanvar faciəsinin dəhşətlərini əks etdirən rəsm əsərlərindən ibarət sərgi ilə tanış olmuş, qanlı Yanvar hadisələrinə həsr olunmuş “Qan yaddaşımız” sənədli filminə tamaşa etmişlər.
Rayonun bədii özfəaliyyət kollektivlərinin ifasında qanlı Yanvar hadisələri ilə bağlı ədəbi-bədii kompozisiya təqdim olunmuşdur.
Bölmənin digər xəbərləri
