Biləsuvarda yerləşən ovçuluq təsərrüfatında flaminqoların sayı xeyli azalıb
Biləsuvar, 24 yanvar, İsmayıl Cəfərli, AZƏRTAC
Hər il ölkə ərazisində əsasən qış fəslində köçəri və oturaq quşların say dinamikası izlənilir, növləri müəyyən edilir. Builki araşdırmalar zamanı bəzi su hövzələrində quşların sayının azaldığı müşahidə olunub.
AZƏRTAC xəbər verir ki, son illərin araşdırmaları zamanı ölkə ərazisində ən çox köçəri və oturaq quşların cəm olduğu su hövzəsi də məlum olub.
Cənub bölgəsində olan Qızılağac Milli Parkı çöl quşlarının daha çox qışladığı ərazidir. Belə ki, ötən mövsüm bu ərazilərdə qışlayan çöl quşlarının sayı təxminən 200 minə yaxın olub. Siyahıda ikinci yerdə Abşeron Milli Parkı gəlir. Ötən mövsüm burada köçəri quşların sayı 160 minə çatıb. Hər il müntəzəm olaraq monitorinq aparan Azərbaycan Ornitoloji Cəmiyyətinin sədri Elçin Sultanov bildirib ki, əvvəllər bu rəqəmlər dəfələrlə yüksək olardı. Son zamanlar iqlim dəyişkənliyi nəticəsində bataqlıq ərazilərində su həcminin azalması da buna təsir edən amillərdəndir.
Aparılan monitorinq heç də ürəkaçan deyil. Əvvəllər yüzlərlə flaminqonun qışladığı Biləsuvar rayonunda yerləşən Mahmudçala ovçuluq təsərrüfatında bu gün cəmi bir flaminqo qeydə alınıb.
“Vaxtilə burada 120 min flaminqolar qışlayıb. Təxminən 10-15 il qabaq sərt qış olanda Mahmudçalaya qışlamaq üçün quşlar şimaldan gəlirdi. İndi qış da sərt deyil, suyun səthi də yüksək deyil. Burada ənənəvi qışlayan quşlar Qızılağaca köçürlər”, - deyə Elçin Sultanov qeyd edib.
Azərbaycan qışlayan quşların sayına görə Avropada 3-cü yerdədir. Bu da Kür-Araz ovalığı və Xəzər sahilində unikal yerlərin olması, orada çoxlu sututarların, küləkdən qorunan buxtaların mövcudluğu və su altı bitkilərlə zənginliyi ilə əlaqədardır. Qeyd olunan amillər isə vəhşi quşlar üçün yem bazasıdır.
Bölmənin digər xəbərləri
