“BİOMÜXTƏLİFLİK” ADLI SƏRGİ AÇILMIŞDIR
AZƏRTAC xəbər verir ki, “Abşeron” Rəsm Qalereyası yeni mövsümü gənc fotoqrafların ekoloji problemlərə həsr olunmuş “Biomüxtəliflik” adlı fotosərgisi ilə açmışdır. Sərginin təşəbbüskarları “Gəncliyin şöləsi” Gənclərin İnkişafı İctimai Birliyi, bp-Azərbaycan şirkəti, habelə bp şirkətinin iri layihələr üzrə müxtəlif tərəfdaşlarıdır.
“Biomüxtəliflik” sərgisi “Azərbaycanın ekoloji problemləri gənclərin gözü ilə” layihəsinin tərkib hissəsidir. Həmin layihə bp-Azərbaycan şirkətinin hələ 2007-ci ildə elan etdiyi VI “Biomüxtəliflik” müsabiqəsində “Ən yaxşı məlumatlılıq” kateqoriyası üzrə əsas mükafata layiq görülmüşdür. Layihənin icrasına bu il iyunun 25-dən başlanmışdır. Biomüxtəlifliyə və ekoloji problemlərə həsr olunmuş indiki fotosərgi həmin layihənin üçüncü mərhələsidir.
Sərgidə 80 foto nümayiş olunur. Bu əsərlər arasında tamaşaçını düşündürən kompozisiyalar az deyildir. Bəzi təbiət mənzərələri tamaşaçıları şəhərin abad küçələrindən ayıraraq ekoloji tarazlığın pozulduğu guşələrə aparır. “Yeraltı çaylar dənizə axır”, “Qırmızı sahil, “Əjdaha”, “Abstrakt əsər”, “Ay landşaftı” və s. kompozisiyalar bu qəbildəndir.
“Təbiətin etirazı”, “Qabarma”, “Partlayış” fotolarında təbiət mənzərələri - gur şəlalə, sahilə doğru yürüyən dalğalar, qürub edən günəş təsvir olunmuşdur. Bu əsərlər sanki insanlara “Daha ayılmağın vaxtıdır” deyə xəbərdarlıq edir.
Ürək ağrıdan mənzərələrlə yanaşı, sərgidə tamaşaçıya nikbinlik və sakitlik aşılayan “Sonalar gölü”, “Burada hələ sakitlikdir”, “Sakit guşə” kimi fotolar da az deyildir.
Tədbirdə çıxış edənlər sərginin əhəmiyyətindən danışmış, gələcəkdə də belə sərgilərin keçirilməsinin vacibliyini vurğulamışlar.
Bölmənin digər xəbərləri
