Birləşmiş Ərəb Əmirlikləri Sudan böhranı ilə bağlı bəyanat yayıb
Bakı, 30 dekabr, AZƏRTAC
Dekabrın 19-da Sudanda və onun xaricində yaşayan Sudan xalqı 2018-ci ilin dekabr inqilabının 7-ci ildönümünü qeyd etdilər. İnqilab pisləşən iqtisadi və siyasi şərtlərə qarşı etiraz kimi başlayıb, Sudan xalqının məqsədlərinə nail olmaq istiqamətində dayanıqlığını və qətiyyətini təcəssüm etdirib. Təxminən 3 il davam edən faciəvi vətəndaş müharibəsindən, mülki keçid hökumətinin devrilməsindən 5 il sonra sudanlıların əsas arzuları müharibənin dərhal dayandırılması və ekstremizmdən, terrorizmdən, habelə əvvəlki rejimlərin dağıdıcı siyasətlərindən azad olmuş demokratik mülki dövlətin qurulmasına yönəlib.
Birləşmiş Ərəb Əmirliklərinin (BƏƏ) Azərbaycandakı səfirliyindən AZƏRTAC-a verilən məlumata görə, bu fikirlər Sudan böhranı ilə bağlı BƏƏ-nin mövqeyini əks etdirən Bəyanatda yer alıb.
Bəyanatda, həmçinin bildirilir:
“Birləşmiş Ərəb Əmirlikləri sarsılmaz mövqeyini bir daha təsdiqləyir:
1. Dərhal və qeyd-şərtsiz atəşkəs elan olunmalı;
2. Humanitar yardımın təcili, təhlükəsiz və maneəsiz şəkildə çatdırılması təmin edilməli;
3. Müharibə aparan tərəflərin heç biri tərəfindən nəzarət olunmayan, sudanlıların təhlükəsizliyə, sabitliyə və sülhə dair arzularını reallaşdıracaq mülki rəhbərlik tərəfindən müstəqil siyasi keçid həyata keçirilməli;
4. Sudan xalqının maraqlarını ali prioritet hesab edən və ABŞ-ın rəhbəri olduğu Kvartetlə (Quad) birgə işləmək öhdəliyi yerinə yetirilməlidir”.
Məlumatda qeyd olunub ki, Afrika İttifaqı Port Sudan Administrasiyasının (PSA) legitimliyini tanımır.
Diqqətə çatdırılıb ki, BƏƏ-nin səyləri hər zaman ilk növbədə humanitar xarakter daşıyıb Bu dağıdıcı vətəndaş müharibəsi dövründə BƏƏ Sudan xalqına qarşı hər iki vuruşan tərəfin - həm PSA-nın, həm də Sürətli Dəstək Qüvvələrinin (Rapid Support Forces) hərəkətlərini qətiyyətlə pisləməyə davam edir və mülki şəxslərə qarşı törədilən zorakılığın, vəhşiliklərin dayandırılması üçün birləşmiş regional və beynəlxalq səylərin vacibliyini vurğulayır.
Bölmənin digər xəbərləri
