Bişkek, 16 noyabr, AZƏRTAC

Bişkek şəhərində Azərbaycanın Qırğız Dostları Klubunun təsis konfransı keçirilib.

Tədbirdə Qırğız Respublikası Prezidenti Aparatının rəsmiləri, Joqorku Keneşin (Parlamentin) deputatları, digər yüksək vəzifəli şəxslər, ziyalılar, KİV rəhbərləri iştirak ediblər. Tədbir şəhidlərimizin xatirəsinin bir dəqiqəlik sükutla yad edilməsi ilə başlayıb. Sonra Azərbaycan tarixini, mədəniyyətini, təbiətinin gözəlliklərini, dinamik inkişafını əks etdirən film göstərilib.

Klubun yaradılmasının təşəbbüskarı olan Qırğızıstanın sabiq xarici işlər naziri, “Ç.Aytmatov adına Beynəlxalq İssık-Kul Forumu” İctimai Birliyinin prezidenti Askar Aytmatov çıxış edərək dəstəyə görə Azərbaycan səfirliyinə minnətdarlıq edib. O, Çingiz Aytmatovun kitablarının qardaş Azərbaycanda çox sevilməsindən, Azərbaycan xalqının onu öz yazıçısı kimi qəbul etməsindən məmnunluq ifadə edib. Həmçinin Azərbaycanın qazandığı uğurlara, dünya miqyasında malik olduğu nüfuza görə sevindiyini bildirib.

Askar Aytmatov deyib ki, bu gün Qırğızıstan ilə Azərbaycan arasında münasibətlər demək olar bütün istiqamətlərdə inkişaf edir. Əməkdaşlığı dərinləşdirmək üçün perspektivlər var.

Ermənistan təcavüzündən danışan A.Aytmatov bildirib ki, Qarabağ bütün Azərbaycan xalqı üçün sağalmayan bir yara idi. O, rəhbəri olduğu ictimai birliyin münaqişə ilə bağlı Azərbaycan Prezidentinə dəstək məktubu yazdığını xatırladıb.

İctimai birliyin prezidenti münaqişənin başa çatması ilə əlaqədar Azərbaycan, Rusiya və Ermənistan rəhbərlərinin imzaladıqları bəyanatın əhəmiyyətini qeyd edib. O, Prezident İlham Əliyevin Azərbaycanın ərazi bütövlüyünü bərpa etmək üçün gördüyü bütün tədbirləri alqışladıqlarını vurğulayıb.

Qeyd edilib ki, Azərbaycanın Qırğız Dostları Klubunun məqsədi ölkələrimizin hərtərəfli əməkdaşlığının inkişafına, Azərbaycan və Qırğızıstan xalqları arasında dostluq və qarşılıqlı anlaşmanın xalq diplomatiyası vasitəsilə dərinləşdirilməsinə kömək etməkdir. Klub onun fəaliyyətini dəstəkləməyə hazır olan hər kəs üçün açıqdır.

Səfir Hidayət Orucov çıxış edərək bildirib ki, qardaş xalqlarımızın ortaq kökləri və oxşar mədəniyyəti var. Səfir ulu öndər Heydər Əliyevin “Manas” dastanının 1000 illiyinə həsr olunmuş təntənəli iclasdakı çıxışından sitat gətirərək deyib ki, “Manas” dastanı bizim ümumi dilimizdə yazılıb. Qeyd edib ki, Çingiz Aytmatov təkcə qırğızların deyil, həm də Azərbaycan xalqının böyük oğludur. Ç.Aytmatov üçün Qırğızıstan olduğu kimi Azərbaycan da vətəndir. Böyük ədibin bütün əsərlərini tərcümə edən və Qırğızıstandan başqa 85 yaşını qeyd edən yeganə ölkə Azərbaycandır. İndiki nəsil iki ölkə arasındakı qarşılıqlı əlaqəni genişləndirmək üçün səy göstərməlidir və inanırıq ki, klub bu istiqamətdə öz töhfələrini əsirgəməyəcək.

Ölkələrimizi və xalqlarımızı etnik və tarixi əlaqələr birləşdirir, ortaq dil, mədəniyyət, ənənələr və adətlər sıx əməkdaşlıq üçün böyük imkanlar yaradır. Ölkələrimiz arasında münasibətlərin dərinləşməsi və genişlənməsi Prezident İlham Əliyevin siyasətinin prioritet istiqamətlərindəndir.

Səfir deyib ki, Ermənistan silahlı qüvvələri döyüş meydanında məğlub olduqlarını başa düşərək münaqişə zonasından yüzlərlə kilometr məsafədə yaşayan mülki şəxslərə hücum etdi. Gecə saat ikidə Azərbaycanın ikinci ən böyük şəhəri Gəncə insanlar yatarkən raket atəşinə tutuldu. Ümumilikdə, ermənilərin yaşayış məntəqələrini sentyabrın 27-dən noyabrın 10-dək atəşə tutması nəticəsində 94 mülki şəxs həlak olub, 407 nəfər yaralanıb, 3326 yaşayış binasına, 120 çoxmərtəbəli binaya və uşaq bağçaları və məktəblər daxil olmaqla 504 mülki infrastruktur obyektinə ciddi ziyan dəyib.

Qırğız Respublikası Prezidentinin Joqorku Keneşdə səlahiyyətli nümayəndəsi Kurmanbek Dıykanbayev, Qırğızıstan Milli Yazıçılar Birliyinin sədri Nurlan Kalıbekov, prezidentliyə namizədlər Arslanbek Maliyev və Toktayım Umetaliyeva, "Antiterror-Alfa" qeyri-hökumət təşkilatının sədri, Milli Təhlükəsizlik Dövlət Komitəsi sədrinin sabiq birinci müavini general-mayor Artur Medetbekov, “Assol” Moda Evinin qurucusu, jurnalist Assol Moldokmatova, iqtisadiyyat elmləri doktoru Qiyas Xəlilov, Qırğızıstanın Əməkdar həkimi Akif Alaferdov və başqaları çıxış edərək Azərbaycanın inkişafından, qitələrarası layihələrin həyata keçirilməsində iştirakından, dünya birliyində yerindən və mövqeyindən söz açıblar. Ölkəmizin Qırğızıstanla əlaqələrindən danışaraq bildiriblər ki, bizim xalqlarımız etnik və tarixi əlaqələr, mədəniyyət, adət-ənənələr və dil ilə bağlıdırlar, bu da öz növbəsində, səmərəli əməkdaşlıq üçün böyük imkanlar verir. Ölkələrimiz arasında son vaxtlar bütün sahələrdə, xüsusilə humanitar sahədə əməkdaşlıq uğurla inkişaf edir. Son illər ərzində həm Bişkekdə, həm Bakıda çoxlu mühüm tədbirlər keçirilib, Azərbaycanın Qırğızıstanda və bu ölkənin Azərbaycanda daha yaxından tanıdılması üçün müvafiq işlər aparılıb. İki ölkə arasında əməkdaşlığın inkişafında Azərbaycanın Qırğızıstandakı səfirliyi də aktiv fəaliyyət göstərir.

Qeyd edək ki, Askar Aytmatov Azərbaycanın Qırğız Dostları Klubunun prezidenti, Qiyas Xəlilov və Kayrat Osmonaliyev isə prezidentin müavinləri seçiliblər.

Təsis konfransının sonunda iştirakçılar qətnamə qəbul ediblər.

Qulu Kəngərli

AZƏRTAC-ın xüsusi müxbiri

Bişkek