“Biz fermerlərə yalnız torpağı əkmək qalır” - Neftçala DAİM-dən reportaj VİDEO
Neftçala, 7 fevral, İsmayıl Cəfərli, AZƏRTAC
Rayonlarda Dövlət Aqrar İnkişaf mərkəzlərinin yaradılmasını ölkədə aqrar islahatların yeni mərhələsi də hesab etmək olar. Bu mərkəzlərin fəaliyyəti aqrar sektorda xidmətlərin göstərilməsində çox üstünlüklər yaradıb. Necə deyərlər, fermerlərin və kəndlilərin torpağa bağlılığını daha da artırıb. Elə bunun nəticəsidir ki, Neftçala rayonunda Mərkəzə müraciət edən fermerlər buradan əliboş qayıtmırlar.
AZƏRTAC xəbər verir ki, Neftçala Dövlət Aqrar İnkişaf Mərkəzi 2018-ci ilin avqustundan fəaliyyət göstərir. İlk gündən rayonda kənd təsərrüfatının bütün sahələrinə yaxından köməklik göstərən Mərkəzin əməkdaşları bu gün də fermerlərlə sıx əlaqədədirlər.
Prezident İlham Əliyevin ötən il imzaladığı Fərmana uyğun olaraq Elektron Kənd Təsərrüfatı İnformasiya Sistemində (EKTİS) fermerlərin qeydiyyatdan keçirilməsi Neftçala DAİM-də də uğurla davam etdirilir. Burada fermerlər üçün elektron xidmət kabinetləri yaradılıb. Neftçala DAİM-in direktoru Ramil Salmanov fermerlərə göstərilən elektron xidmətlərdən danışarkən deyib: “Elektron sistemlə bağlı Neftçala DAİM-də işlər yekunlaşmaq üzrədir. Yeddi mindən çox fermer Elektron Kənd Təsərrüfatı İnformasiya Sistemində qeydiyyatdan keçib. Altı mindən çox fermer 2020-ci il üçün payızlıq əkinlərini bəyan ediblər. Həmin fermerlərin 1500-dən çoxu üçün plastik kartlar sifariş verilib. Fevral ayından fermerlər ardıcıllıqla yeni fermer kartlarını banklardan əldə edəcəklər. Sonra fermerlər yeni qaydalara əsasən subsidiyalarını alacaqlar”.
Neftçala DAİM-də üç sektor fəaliyyət göstərir. Bunlar maliyyə-təsərrüfat, bitkiçilik və heyvandarlıq sektorlarıdır. Burada, həmçinin baytarlıq, informasiya və fermerlərə müxtəlif xidmətlər üçün otaqlar da ayrılıb. Bu sektorlarda 20-dən çox əməkdaş çalışır. Fermerlərlə söhbət zamanı onlar dövlət tərəfindən yaradılan imkanlardan lazımınca faydalandıqlarını bildiriblər.
EKTİS-də qeydiyyatdan keçmək üçün DAİM-ə gələn fermer Loğman Muradov deyib: “Məni burada gülərüz qarşıladılar. Gözəl şərait yaradılıb, lazımi köməyi də göstərdilər, məsləhət aldım. Dövlətimizdən də çox razıyıq. Prezidentimiz sağ olsun, bizə subsidiyalar ayrılması üçün tapşırıqlar verib. İnşallah yeni subsidiyanı kartla alacağam. Əkin-biçinlə, dərmanlarla bağlı dövlət tərəfindən böyük kömək göstərilir. Biz fermerlərə yalnız torpağı əkmək qalır”.
DAİM-in fəaliyyətindən razılıqla danışan digər fermer isə Əvəz Sadıqovdur: “Mən öz təsərrüfatımla bağlı müraciət etmişdim. DAİM-in əməkdaşları da bizə məsləhət verdilər. Sağ olsunlar, işlərimizi yoluna qoydular. Elektron sistemdə qeydiyyatdan keçdim. Kartımın alacağım vaxtı gözləyirəm”.
Neftçala Dövlət Aqrar İnkişaf Mərkəzində Fermerlərin Koordinasiya Şurası da yaradılıb. Şuranın üzvləri təcrübəli və qabaqcıl fermerlərdən ibarətdir. Eyni zamanda, buraya könüllülər də cəlb olunub. DAİM-də müntəzəm olaraq könüllülərlə görüşlər keçirirlər.
Qeyd edək ki, ötən il Neftçalada, ümumilikdə, 5080 hektar sahədə pambıq, 7792 hektar sahədə buğda, 32145 hektar sahədə isə arpa becərilib. 2019-cu ildə rayonda 9518 hektar yem bitkisi - yonca əkilib. Rayonun heyvandarlıq təsərrüfatlarında 42766 baş iribuynuzlu, 141420 baş xırdabuynuzlu heyvan saxlanılır.
Bölmənin digər xəbərləri
