Biznesin reallaşdırılması zamanı ekoloji tələblərə ciddi riayət olunmalıdır
Ombudsmanın təşəbbüsü ilə yaradılmış biznes və insan hüquqları sahəsində işçi qrupunun təşkil etdiyi “dəyirmi masa” “Biznesin reallaşdırılması zamanı ekoloji tələblərə riayət olunması” mövzusuna həsr olunub. “Dəyirmi masa”da aidiyyəti dövlət qurumlarından və QHT nümayəndələrindən ibarət tərkibdə qrup üzvləri iştirak ediblər.
Tədbirdə çıxış edən Azərbaycan Respublikasının İnsan Hüquqları üzrə Müvəkkili Elmira Süleymanova son illər dünya iqtisadiyyatındakı elmi-texniki inkişafla bağlı dəyişikliklərin ətraf mühitə ciddi ziyan vurduğunu, ekoloji məsələlərin qlobal problemlərin ilk sırasında yer aldığını söyləyib. Qeyd olunub ki, bu səbəbdən də ekologiyanın qorunub saxlanılması və davamlı istifadəsinə dair ciddi tədbirlərin görülməsi bəşəriyyət qarşısında duran ən vacib məsələlərdəndir.
Müvəkkil ekoloji problemlərin yaranma səbəblərinin və həll edilməsi yollarının araşdırılmasının zəruriliyini vurğulayaraq, sürətlənən sənayeləşmə nəticəsində ekoloji tarazlığın pozulması, sənaye müəssisələri və digər biznes qurumları tərəfindən ətraf mühitin mühafizəsinin bir sıra beynəlxalq təşkilatların, o cümlədən BMT-nin əsas tədqiqat predmetinə çevrildiyini, bu sahədə mühüm sənədlərin işlənib hazırlandığını bildirib.
E.Süleymanova “Azərbaycan 2020: gələcəyə baxış” İnkişaf Konsepsiyasının təsdiq edilməsi haqqında” dövlətimizin başçısının 2012-ci il 29 dekabr tarixli Fərmanına müvafiq olaraq “Ətraf mühitin mühafizəsi və ekoloji problemlərlə mübarizə tədbirləri” çərçivəsində təkliflərini səsləndirib. Bu təkliflərə alternativ enerji mənbələrindən istifadəyə imkan verən yeni texnologiyaların tətbiqinə lazımi şəraitin yaradılması, ölkəyə elektromobillərin və hibrid mühərriklərlə təchiz olunmuş avtomobillərin idxal edilməsinin stimullaşdırılması məqsədi ilə bu nəqliyyat vasitələrinə gömrük və digər güzəştlərin tətbiq olunması, yaşayış komplekslərinin tikintisi zamanı orada yaşıllıqların salınması ilə bağlı şirkətlərin üzərinə müvafiq öhdəliklərin qoyulması və digər məsələlər daxildir. Həmçinin mebel və taxta emalı sənayesi ilə məşğul olan subyektlərin yeni meşəliklərin və yaşıllıqların salınması layihələrinin hazırlanmasına və icrasına cəlb olunması, ekoloji qanunvericiliyin təkmilləşdirilməsi ilə bağlı birgə müzakirələrin, treninq-seminarların keçirilməsi təklif olunub.
Müvəkkil, eyni zamanda, Abşeronda neftlə çirklənmiş torpaqların təmizlənməsini, su hövzələrinin, dənizin və çayların istehsalat tullantıları ilə çirklənməsinin qarşısının alınmasını, ölkə landşaftının saflaşdırılmasını, çöl və çəmənliklərin qorunmasını nəzərdə tutan proqramların hazırlanmasını da təklif edib.
“Dəyirmi masa”da Ekologiya və Təbii Sərvətlər, İqtisadiyyat və Sənaye nazirliklərinin əməkdaşları sahibkarlıq fəaliyyəti, sənaye təhlükəsizliyi, biznesin reallaşdırılması zamanı ekoloji tələblərin icrasına nəzarətin həyata keçirilməsi və digər məsələlərdən bəhs ediblər. Digər çıxış edənlər mövzu ilə bağlı fikir və mülahizələrini bildiriblər.
Görüşdə işçi qrupunun gələcək fəaliyyət istiqamətləri də müzakirə olunub.
Bölmənin digər xəbərləri
