BMA-nın İxtisas musiqi məktəb-studiyası şagirdlərinin Qarabağ Universitetində “Zəfər” konserti
Bakı, 17 noyabr, AZƏRTAC
Üzeyir Hacıbəyli adına Bakı Musiqi Akademiyasının (BMA) İxtisas musiqi məktəb-studiyası şanlı Zəfər tariximizə həsr olunmuş bir sıra əhəmiyyətli tədbirlər həyata keçirib. Bu layihələr arasında Xankəndi şəhərində fəaliyyət göstərən Qarabağ Universitetin İncəsənət fakültəsinin Böyük zalında Məktəb-studiya şagirdlərinin iştirakı ilə təşkil olunan konsert proqramı xüsusi önəm kəsb edib. Bu konsert dahi bəstəkarımız Üzeyir Hacıbəylinin 140 illik yubileyi çərçivəsində keçirilən tədbirlər sırasına daxildir.
Bu barədə AZƏRTAC-a Üzeyir Hacıbəyli adına BMA-nın İxtisas musiqi məktəb-studiyasının böyük elmi işçisi, musiqişünas Şəfəq Hacıyeva məlumat verib.
Bildirib ki, Qarabağ Universitetində Azərbaycan musiqi və incəsənət məktəbləri arasında ilk olaraq məhz BMA-nın İxtisas musiqi məktəb-studiyası səfər edərək öz pedaqoji və yaradıcı fəaliyyətini təqdim edib. Məktəb-studiya şagirdlərinin konsertinə Qarabağ Universitetinin İncəsənət fakültəsinin rəhbər şəxsləri də xüsusi iştirakları ilə dəyər qatıblar. Tədbirdə fakültənin dekanı, bəstəkar Türkər Qasımzadə, dekan müavini, musiqişünas Gülxanım Əsədova və kafedra müdiri, tarzən Arslan Növrəsli iştirak ediblər.
İlk olaraq, professor Türkər Qasımzadə bu tədbirin olduqca əlamətdar xarakter daşıdığını söyləyib. O, Qarabağ Universitetinin İncəsənət fakültəsi ilə İxtisas musiqi məktəb-studiyasının əlaqəli şəkildə fəaliyyət göstərməsini və bu əməkdaşlığın gələcək illərdə daha da genişləndirilməsinin vacibliyini vurğulayıb. Məktəb-studiyanın yaradıcısı və 40 ildən artıq bu müəssisəyə rəhbərlik etmiş, Azərbaycanın Əməkdar incəsənət xadimi, professor Tərlan Seyidovun Azərbaycan musiqi elmi və mədəniyyəti üçün göstərdiyi yenilikçi fəaliyyətindən bəhs edib. O, həmçinin hazırda müəssisənin direktoru, dosent Sevda Məmmədovanın rəhbərliyi ilə bu ənənələrin qorunub saxlanılması və uğurla inkişaf etdirilməsini vurğulayıb.
“Zəfər” bayramına həsr olunmuş konsert Məktəb-studiyanın müəllimi Şəfəq Hacıyeva tərəfindən açıq elan edilib. O, konsertin mahiyyətindən söz açaraq, Zəfər tariximizi, qəhrəmancasına döyüşən şəhidlərimizi, eyni zamanda, qazilərimizi hörmətlə anıb.
Rəngarəng musiqi nömrələri ilə seçilən tədbirdə müxtəlif ixtisaslar üzrə təhsil alan gənc musiqiçilər uğurlu çıxışları ilə dinləyicilərin ruhunu oxşayıblar.
Tədbirin sonunda BMA-nın İxtisas musiqi məktəb-studiyasının direktoru, dosent Sevda Məmmədovaya əvvəlcə Qarabağ Universitetinin İncəsənət fakültəsinin rəhbərliyinə yaradılan şərait və göstərilən səmimi qarşılanmaya görə dərin minnətdarlığını bildirib. Xalqımızı şanlı Zəfər bayramı münasibətilə bir daha ürəkdən təbrik edib, bu tarixi uğurun əhəmiyyətini xüsusi vurğulayıb.
Qeyd edək ki, BMA-nın İxtisas musiqi məktəb-studiyasının əsas amalı Azərbaycan musiqi elmi və mədəniyyətinə ləyaqətlə xidmət etmək və onu nəsildən-nəsilə ötürməkdir.
Bölmənin digər xəbərləri
