BMT-NİN BAŞ KATİBİ KOFİ ANNANIN BEYNƏLXALQ QADINLAR GÜNÜ MÜNASİBƏTİLƏ MÜRACİƏTİ
Sənəddə nəzərə çarpdırılır ki, QİÇS qadınların təmsil etdiyi cəmiyyətin həyatına zərbə endirdiyinə görə çıxılmaz vəziyyət yaranır. QİÇS nəticəsində aztəminatlı əhali sırasından olan qadınların vəziyyəti iqtisadi cəhətdən daha çox ümidsizləşir, çünki onlar mənzil, əmlak və ya miras hüquqlarından, hətta səhiyyə sahəsində müvafiq xidmətlərdən çox vaxt məhrum olurlar. Dünyanın bir çox ölkələrinin kənd yerlərində QİÇS özünüdolandırma sistemlərinin süqutuna gətirib çıxarmışdır, halbuki bu sistemlər əsrlər boyu qadınlara quraqlıq və aclıq dövrlərində ailələrini dolandırmağa kömək etmişdir. Həmin sistemlərin süqutu, ilk növbədə, ailələrin dağılmasına, miqrasiyaya və immunitet çatışmazlığı virusu ilə yoluxma təhlükəsinin daha da artmasına gətirib çıxarır. Beləliklə, cəmiyyət QİÇS-in qadınlara vurduğu öldürücü ziyanın əvəzini dəfələrlə ödəməli olur.
Sənəddə göstərilir ki, qadınlara daha çox güc və inam verə biləcək və cəmiyyətin bütün səviyyələrində onların kişilərlə münasibətlərini köklü surətdə dəyişə biləcək mühüm, konkret dəyişikliklər həyata keçirilməlidir. Elə dəyişikliklər ki, qadınların əmlak və miras hüquqlarının müdafiəsini gücləndirsin və onların qoruyucu vasitələrdən istifadəsini təmin etsin.
Məhz bu səbəbdən ötən ay BMT-nin İÇV/QİÇS üzrə birləşmiş proqramı (YUNEYDS) qadınların hüquq və səlahiyyətlərinin genişləndirilməsini təmin etmək və bütün dünyada qadınların İÇV/QİÇS-ə qarşı mübarizədə oynadıqları mühüm rolu inkişaf etdirmək məqsədi ilə “Qadın və QİÇS” probleminə dair qlobal koalisiya yaratmışdır.
Baş katib məktubunda xüsusi vurğulayır: “Səfərdə olduğum ölkə və cəmiyyətlərin əksəriyyətində QİÇS-ə qarşı mübarizənin ən fəal iştirakçıları və tərəfdarları məhz qadınlardır. Epidemiyanın geniş yayıldığı hər yerdə qəhrəman qadınların qrup və kooperativləri mövcuddur. Bu qurumlar xəstəliyin qarşısının alınması və xəstələrə qulluq göstərilməsi sahəsində əhəmiyyətli iş görürlər. Bu qadınları dəstəkləmək və başqalarını da onlardan nümunə götürməyə həvəsləndirmək bizim gələcək üçün strategiyamız olmalıdır. Bu müharibənin əsl qəhrəmanlarına məhz onların arasında rast gəlmək olar. Vəzifəmiz onlara güc, vəsait və ümid verməkdən ibarətdir”.
Bölmənin digər xəbərləri
