BMT TŞ-də qazanılan qələbə Prezident İlham Əliyevin xalqımıza növbəti hədiyyəsidir RƏY
Bakı, 31 dekabr, AZƏRTAC
Azərbaycan torpaqlarının Ermənistanın işğalı altında olduğu zaman BMT Təhlükəsizlik Şurasının daimi üzvü və artıq “ömrünü başa vurmuş” ATƏT-in Minsk qrupunun həmsədrlərindən biri olan Fransa müxtəlif diplomatik vasitələrlə, ikili oyunlarla Şuranın Azərbaycan ərazilərinin qeyd-şərtsiz azad olunması ilə bağlı qətnamələrinin icrasına mane olmağa çalışır, hər iki təsisatdakı mandatından sui-istifadə etməklə beynəlxalq hüququn norma və prinsiplərinin əleyhinə çıxış edirdi. Torpaqlarımızın işğaldan azad edilməsi ilə nəticələnən 44 günlük müharibənin ilk günlərindən başlayaraq Fransa özünün uğursuz lideri Emmanuel Makronun timsalında ölkəmizə qarşı qərəzli və aqressiv mövqeyini daha açıq müstəviyə keçirdi, həm BMT Təhlükəsizlik Şurasında, həm də digər beynəlxalq platformalarda ölkəmizin əleyhinə təzyiq xarakterli sənədlərin qəbul edilməsinə dəfələrlə cəhd göstərdi, lakin buna nail olmadı. Hətta dominant rol aldığı Frankofoniya Təşkilatında belə ölkəmiz əleyhinə sənəd qəbul etdirməyi bacarmayan rəsmi Paris, əslində, baş verənlərdən nəticə çıxarmalı, uğursuzluqlarının təməlində öz şəxsi hisslərinə, emosiyalarına, aqressiv dünyagörüşünə yenilən Emmanuel Makronun, həmçinin beynəlxalq hüququn norma və prinsiplərinə münasibətdə sərgilənən hörmətsizliyin dayandığını anlamalı, dövlətlərin beynəlxalq miqyasdakı nüfuzunun onların ərazilərinin böyüklüyünə və əhalisinin sayına görə deyil, liderlərinin ədalətli, məsuliyyətli və prinsipial mövqeyinə görə müəyyənləşdiyini başa düşməli idi.
Bu fikirləri AZƏRTAC-a açıqlamasında siyasi ekspert Elçin Mirzəbəyli ifadə edib.
O qeyd edib ki, Fransa və onun ermənilərin məğlubiyyətinə şam tutan siyasətçiləri ötən zaman kəsiyində düçar olduqları uğursuzluqların səbəblərini araşdırmaq əvəzinə, Azərbaycana qarşı qərəz marafonunu davam etdirmək, BMT Təhlükəsizlik Şurasında “bəxtlərini yenidən sınamaq” niyyətinə düşdülər və yenə də iflasa uğradılar. Fransa daimi üzv olduğu BMT Təhlükəsizlik Şurasında növbəti dəfə rüsvayçı məğlubiyyətə uğramaqla yanaşı, Azərbaycanın növbəti parlaq qələbəsinə şahidlik etməklə kifayətlənməli oldu.
Məlum olduğu kimi, Fransa-Ermənistan cütlüyü hələ 44 günlük müharibə dövründə və 2022-ci ilin sentyabrında BMT Təhlükəsizlik Şurasında Azərbaycan əleyhinə qətnamə qəbul etdirməyə çalışsalar da, buna nail ola bilməmişdilər.
Bütün bunlara baxmayaraq, “Santa Klaus” olmaq iddiasına düşərək Ermənistana Azərbaycan əleyhinə BMT TŞ-nin bəyanatını, sonra isə qətnaməsini “milad hədiyyəsi” kimi təqdim etmək niyyəti güdən Fransa “santa” Jonas (uğursuz) statusu ilə kifayətlənmək məcburiyyətində qaldı. Ermənilərə “sonsuz sevgi”sinə görə Makrondan geri qalmayan Pyer Rişarın baş rol aldığı “Uğursuzlar” filmini və uğursuz Fransua Perren obrazını yəqin ki, çoxları xatırlayır. Makronun ardıcıl uğursuzluqları isə sübuta yetirir ki, hətta Pyer Rişerin məşhur obrazından daha çox uğursuzluğa düçar olmaq mümkün imiş.
Beləliklə, Fransanın son 10 gün ərzində BMT Təhlükəsizlik Şurasında müzakirəyə çıxardığı və guya Laçın-Xankəndi yolunda “humanitar fəlakət”in baş verdiyini ifadə edən, açıq-aşkar ermənipərəst sənəd, nəticədə rəsmi Paris üçün, sözün əsl mənasında, kabusa çevrildi. BMT TŞ-də cərəyan edən proseslərin başında Fransa Prezident Administrasiyası və Fransa Prezidentinin xarici siyasət məsələləri üzrə müşavirlərinin dayanması, sübuta yetirirdi ki, belə bir sənədin qəbul edilməsi Emmanuel Makron üçün “ölüm-qalım” məsələsidir. Yəni, Makron bütün gücünü və imkanlarını ortaya qoyaraq, yeni il öncəsi Ermənistanı mükafatlandırmaq, Azərbaycanı isə “cəzalandırmaq” istəyirdi.
Nəticədə isə BMT TŞ-nin daimi üzvü və hazırda TŞ-nin sədri Fransa 10 gündür ki, bütün resurslarını işə salsa da, bir bəyanatı qəbul etdirə bilmədi. Əvvəla, bəyanat fransızların ilkin təqdim etdiyi layihədən fərqli olaraq əsaslı dərəcədə dəyişdirildi. Ermənilər üçün hədiyyə kimi hazırlanmış bəyanatdan “Dağlıq Qarabağ” ifadəsi çıxarıldı, “humanitar yardım olarsa, bu, yalnız Azərbaycanın ərazi bütövlüyü və suverenliyinə hörmət əsasında ola bilər” və “Azərbaycanın ərazi bütövlüyünə dəstək” kimi ölkəmizin suveren hüquqlarının müdafiəsinə yönəlmiş ifadələr daxil edildi. Azərbaycan diplomatiyası bütün imkanlarından istifadə edərək Fransanı məhz onun öz meydanında rüsvayçı məğlubiyyətə uğratdı.
“Azərbaycanın özünü qlobal miqyasda büruzə verən gücünün, qətiyyətli və prinsipial mövqeyinin və əldə etdiyi nəticəsinin sirri, şübhəsiz ki, Prezident İlham Əliyevin iti zəkasında, xarakterində, yüksəl diplomatik məharətində, dost qazanmaq bacarığındadır. BMT Təhlükəsizlik Şurasında əldə olunan qələbə Prezident İlham Əliyevin öz xalqına növbəti hədiyyəsidir”, - deyə E.Mirzəbəyli vurğulayıb.
Bölmənin digər xəbərləri
