Bolqarıstan MSK: Parlament seçkilərində “Mütərəqqi Bolqarıstan” koalisiyası qalib gəlib
Bakı, 20 aprel, AZƏRTAC
Bolqarıstan Mərkəzi Seçki Komissiyası (MSK) aprelin 19-da keçirilən parlament seçkilərinin ilkin nəticələrini bazar ertəsi günü açıqlayıb. Belə ki, dairə seçki komissiyalarında işlənmiş seçki məntəqələrindən daxil olan bülletenlərin 97,52 faizi sayılıb. AZƏRTAC bu barədə Bolqarıstan Xəbər Agentliyinə istinadla xəbər verir.
Bolqarısan MSK qeyd edib ki, 4 faizlik seçki limitini keçən partiyalar və koalisiyalar aşağıdakılardır:
“Mütərəqqi Bolqarıstan” koalisiyası - 44,723%
GERB-UDF bloku - 13,388%
“Dəyişikliyə davam et – demokratik Bolqarıstan” koalisiyası - 12,807%
“Hüquq və azadlıqlar uğrunda hərəkat” - 6,755%
“Vazrajdan” partiyası- 4,301%.
Seçki Məcəlləsinə əsasən, MSK alınan səsləri, partiyalar və koalisiyalar arasında parlamentdəki yerlərin bölüşdürülməsini seçki günündən ən gec dörd gün sonra, seçilmiş Parlament üzvlərinin adlarını isə seçki günündən ən gec yeddi gün sonra elan etməlidir.
Bu, 2021-ci ildən bəri Bolqarıstanda keçirilən səkkizinci parlament seçkiləri olub.
Bolqarıstanın sabiq Prezidenti və Hərbi Hava Qüvvələri komandanı Rumen Radev “Mütərəqqi Bolqarıstan” partiyasına liderlik edir. O, bu koalisiya vasitəsilə hakimiyyətə qayıtmağa hazırlaşır.
Bölmənin digər xəbərləri
