BÖYÜK BRİTANİYA SƏFİRİNİN LƏNKƏRANA SƏFƏRİ BAŞA ÇATMIŞDIR

23.06.2004 [00:33]
Çap et
A⁺ A^-

AZƏRTAC-ın müxbiri xəbər verir ki, Böyük Britaniyanın Azərbaycandakı fövqəladə və səlahiyyətli səfiri cənab Lorens Bristoun iyunun 22-də Lənkəranla tanışlığı davam etdirmişdir.

Lənkəran rayonunun Nərimanabad qəsəbəsindəki “Xəzər-Balıq” MMC-nə gələn səfir burada balıq ovu və istehsal sahələri ilə yaxından tanış olmuş, müəssisənin problemləri ilə maraqlanmışdır.

Rayonda fəaliyyət göstərən siyasi partiyaların rəhbərləri ilə görüşündə Lorens Bristoun Azərbaycanın neft sektorundan əldə olunan gəlirin ölkənin iqtisadi inkişafına təkan verəcəyini bildirmişdir.

Böyük Britaniyanın ölkəmizdəki səfiri Lənkəran şəhərindəki “Böyük bazar” məscidində olmuş, dindarlarla görüşmüşdür.

Həmin gün səfir Lənkəran Regional Sahibkarlar Assosiasiyasında da görüş keçirmişdir.

Bununla da Böyük Britaniyanın ölkəmizdəki səfirinin Lənkərana ikigünlük səfəri başa çatmışdır.