Böyük Britaniyada Avropa İttifaqına qayıdış istəyi artır
London, 3 yanvar, AZƏRTAC
Britaniyalı seçicilər Avropa İttifaqına (Aİ) qayıtmaq ideyasını Fransa və İtaliya seçicilərindən daha çox dəstəkləyir.
AZƏRTAC “The Independent”ə istinadla xəbər verir ki, bunu “YouGov” tərəfindən altı Avropa ölkəsində aparılmış sorğunun nəticələri göstərir. Sorğuya əsasən, Böyük Britaniyada respondentlərin 50 faizi bu gün referendum keçirilsə, ölkənin Aİ-yə üzv olmasına səs verəcəyini bildirib. Müqayisə üçün, bu göstərici Fransada 45 faiz, İtaliyada isə 46 faiz təşkil edir. Aİ-yə üzvlüyün dəstəklənməsi Almaniyada 62 faiz, Danimarkada 75 faiz, İspaniyada isə 66 faiz olub.
Araşdırma həmçinin göstərib ki, Britaniyada respondentlərin cəmi 31 faizi Aİ-dən kənarda qalmağa səs verəcəyini deyib. Bu, təxminən on il əvvəl keçirilmiş “Brexit” referendumunda Aİ-dən çıxmanı dəstəkləyən 52 faizlə müqayisədə xeyli aşağı göstəricidir. Eyni göstərici Fransada 30 faiz, İtaliyada 28 faiz, Almaniyada 20 faiz, Danimarkada 14 faiz, İspaniyada isə 13 faiz olub.
Sorğunun nəticələri Baş nazir Kir Starmer üçün əlavə siyasi təzyiq yaradır. Bu, Douninq Stritin Böyük Britaniyanın Aİ ilə bağlı “qırmızı xətləri”nə sadiq qalacağını açıqlamasından bir neçə gün sonra baş verib. Bununla yanaşı, səhiyyə naziri Ves Stritinq Avropa ilə daha dərin ticarət münasibətlərinin ölkənin iqtisadi artımına töhfə verə biləcəyini bildirib ki, bu da Baş nazirin mövqeyinə dolayı etiraz kimi qiymətləndirilib.
London
Bölmənin digər xəbərləri
