Böyük Britaniyada küçədə gecələmək cinayət sayılmayacaq
London, 11 iyun, AZƏRTAC
İngiltərə və Uelsdə küçədə gecələmək bu ildən etibarən artıq cinayət sayılmayacaq.
AZƏRTAC BBC-yə istinadla xəbər verir ki, hökumət 200 illik Vagranlıq Aktının (Vagrancy Act) ləğvini planlaşdırır. Sözügedən qanun ilk dəfə 1824-cü ildə artan evsizlik probleminin qarşısını almaq məqsədilə qəbul edilmişdi. Lakin Baş nazirin müavini və mənzil məsələləri üzrə nazir Ancela Reyner bu qanunu qəddar və köhnəlmiş adlandıraraq onun ləğvini zəruri hesab edib. Yeni qanun layihəsi isə qəsdən dilənçilik, təşkilatlanmış dəstələrin fəaliyyətləri və özəl ərazilərə icazəsiz daxil olma kimi halları hədəfə alacaq.
“İnsan yalnız küçədə yatdığına görə heç vaxt cinayətkar elan edilməməlidir. Bu qanunu ləğv etməklə biz cəmiyyətimizin ən həssas təbəqələrinə qarşı iki əsrlik ədalətsizliyə son qoyuruq”, - deyə Ancela Reyner bildirib.
Rəsmi statistikaya əsasən, 2023-cü ildə Vagranlıq Aktı çərçivəsində ümumilikdə 79 nəfərə qarşı ittiham irəli sürülüb, 59 nəfər isə məhkum edilib. Halbuki bu rəqəmlər 2011-ci ildə müvafiq olaraq 1 050 və 810 idi.
Qeyd edək ki, qanunun ləğvi ideyası ilk dəfə 2022-ci ildə əvvəlki Mühafizəkarlar hökuməti tərəfindən irəli sürülmüşdü. Lakin yeni qanunvericilik qəbul olunmadan ötən il parlament seçkiləri elan edildiyi üçün bu təşəbbüs yarımçıq qalmışdı.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
