Böyük britaniyalı ssenarist və kinorejissor Bakıda seminar keçirmişdir
Bakı, 5 noyabr (AZƏRTAC). Böyük Britaniyalı ssenarist və kinorejissor Con Pol Freyzer Nizami Kino Mərkəzində azərbaycanlı kino ssenaristlər üçün seminar keçirmişdir.
Seminar Böyük Britaniyanın mədəniyyət və təhsil sahəsində əməkdaşlıq qurumu olan “British Council” (Britaniya Şurası), bu ölkənin Bakıdakı səfirliyi və “Nərimanfilm” şirkəti tərəfindən təşkil edilmişdir.
AZƏRTAC xəbər verir ki, layihənin məqsədi bacarıq və vərdişlərini beynəlxalq standartlar səviyyəsinə çatdırmaqda ssenaristlərə kömək etməkdir.
Azərbaycandan 15-dən çox ssenarist üç gün ərzində bilik və təcrübə mübadiləsinə, habelə əməkdaşlığın yeni modellərinin nəzərdən keçirilməsinə qatılmışdır.
Ssenarist və kinorejissor Pol Freyzer yazıçılıq və rejissorluq fəaliyyətindən başqa dünyanın müxtəlif guşələrində həm fərdi qaydada, həm də seminarlarda məsləhətlər verir. O, Avstraliya, Cənubi Afrika Respublikası, Polşa, Almaniya, İrlandiya, Böyük Britaniya, İsveç, Bolqarıstan, İtaliya, Sloveniya, Bosniya və Herseqovinada ssenarilərin yaradılması üzrə seminarlar və treninqlər keçirmiş, bir çox ölkələrdə sessiya və seminarlarda iştirak etmişdir.
Layihə çərçivəsində “Bir, iki, üç, öl” filminin təqdimatı olmuşdur. Komediya janrında çəkilən ekran əsəri Bakıda keçirilən Avropa film festivalı çərçivəsində “Park Cinema” və “Metro park” kinoteatrlarında da nümayiş etdirilmişdir.
Bölmənin digər xəbərləri
