“bp-AZƏRBAYCAN” ŞİRKƏTİ “ÇIRAQ” NEFT LAYİHƏSİ ÜZRƏ İCTİMAİYYƏTLƏ MƏSLƏHƏTLƏŞMƏ XARAKTERLİ GÖRÜŞ KEÇİRMİŞDİR
AZƏRTAC xəbər verir ki, sentyabrın 23-də Bakıda “Azəri-Çıraq-Günəşli” yataqlar blokuna daxil olan “Çıraq” neft layihəsi (ÇNL) üzrə Ətraf Mühitə və Sosial Sahəyə Təsirin Qiymətləndirilməsi (ƏMSTQ) Təkliflər Proqramı çərçivəsində “bp-Azərbaycan” şirkəti Azərbaycan Beynəlxalq Əməliyyat Şirkəti (ABƏŞ) adından ictimaiyyətlə məsləhətləşmə xarakterli görüş keçirmişdir.
Görüşdə “bp-Azərbaycan” şirkətinin mütəxəssisləri müxtəlif təqdimatlarla çıxış etmişlər.
“bp-Azərbaycan” şirkətinin ÇNL üzrə direktoru İlqar Məmmədov bildirmişdir ki, yeni yataqdan neft Xəzərin 175 metr dərinliyindən əldə olunacaqdır. Kəşfiyyat işlərinin 2007-ci ildə yekunlaşdığı, cari ildə isə ilkin layihənin yekunlaşmasının nəzərdə tutulduğu diqqətə çatdırılmışdır. Bildirilmişdir ki, 2009-cu ildə mühəndis-layihə işlərinə, 2013-cü ildə isə ilkin neft hasilatına başlanacaqdır. Yataqdan ildə 331 milyon barrel neftin əldə olunacağı gözlənilir.
Layihənin ətraf mühitin qorunması ilə bağlı əlaqələndiricisi Ayaz Həsənov bildirmişdir ki, sentyabr ərzində ekologiyanın qorunması ilə bağlı mütəxəssislərin və ictimaiyyətin fikirlərinin öyrənilməsinə cəhd olunmuşdur. Gələn ilin aprelində müvafiq sənədlər Ekologiya və Təbii Sərvətlər Nazirliyinə təqdim olunacaqdır. Nazirliyin rəyindən sonra prosesin növbəti mərhələsi başlanacaqdır. Yataqda neft hasilatı zamanı ekologiyanın qorunması üçün müasir avadanlıqlardan istifadə ediləcəyi də qeyd olunmuşdur.
Bölmənin digər xəbərləri
