“bp-AZƏRBAYCAN” ŞİRKƏTİNİN YENİ PREZİDENTİ BİLL ŞREYDER OLACAQDIR
Bill Şreyderin bp-də 26 illik iş təcrübəsi vardır. Bu illər ərzində o, bp-nin kimya məhsulları, neft emalı və marketinq, dəniz əməliyyatları, axtarış-kəşfiyyat və hasilat kimi sahələrində müxtəlif rəhbər vəzifələrdə çalışmışdır. Onun bu vəzifələri icra etdiyi yerlər isə ABŞ, London, Şimal dənizi və İndoneziyadan tutmuş Anqolayadək müxtəlif ölkə və şəhərləri əhatə edir. Bill Bakıya özünün sonuncu təyinat yeri olan “bp-Anqola” şirkətinin baş icraçısı vəzifəsindən gəlir.
Bill Şreyderin Sinsinnati Universitetindən kimya mühəndisi elmi dərəcəsi vardır. O, 3 övlad atasıdır.
Bill Şreyder yeni təyinatı ilə bağlı demişdir ki, “bp-Azərbaycan”a rəhbərliyi özümə fəxr hesab edirəm və bunu səbirsizliklə gözləyirəm. D.Vudvordun və onun rəhbərlik etdiyi kollektivin həyata keçirdiyi işlər çox böyük heyranlıq doğurur və mənim məqsədim bu uğuru irəli aparmaq, bp-nin, tərəfdaşlarımızın və Azərbaycan xalqının mənafeyinə xidmət edən dünya səviyyəli biznes yaratmağı davam etdirmək olacaqdır.
Xatırladaq ki, D.Vudvord bp-nin Azərbaycandakı prezidenti vəzifəsinin icrasına 1998-ci ilin dekabrında başlamışdır. Onun rəhbərliyi altında bp “Azəri-Çıraq-Günəşli” neft yatağının tammiqyaslı işlənilməsini həyata keçirmiş, Bakı-Tbilisi-Ceyhan boru kəmərini tikmişdir və tezliklə də “Şahdəniz” qaz-kondensat yatağının işlənilməsinin 1-ci mərhələsi üzrə qaz hasilatına başlanacaqdır.
Bölmənin digər xəbərləri
