BQXK BƏRDƏDƏKİ OFİSİNİ YENİDƏN AÇMIŞDIR
Açılış mərasimində BQXK-nın Azərbaycandakı nümayəndəliyinin rəhbəri xanım Meri Vernts, Azərbaycan Qızıl Aypara Cəmiyyətinin (AzQAC) prezidenti Novruz Aslanov və Bərdə Rayon İcra Hakimiyyətinin başçısı İlham Ağayev çıxış etmişlər. Ofisin Dağlıq Qarabağ münaqişəsi ilə bağlı humanitar məsələlərlə məşğul olmaq üçün daha yaxşı imkan əldə etmək məqsədi ilə açıldığı diqqətə çatdırılmışdır. Məlumat verilmişdir ki, Bərdədə 1992-1999-cu illərdə fəaliyyət göstərmiş ofisini yenidən açmaqla BQXK Dağlıq Qarabağ münaqişəsi ilə bağlı itkin düşənlərin taleyinin müəyyənləşdirilməsində və cəbhə xətti boyunca Təhlükəsiz Oyun Meydançaları layihəsinin həyata keçirilməsində AzQAC-a kömək göstərməyi planlaşdırır.
Bildirilmişdir ki, müharibədən qalmış hərbu sursat qalıqlarının partlamasından zərər çəkmiş 15 kənddə AzQAC tərəfindən 2005-ci ildə təhlükəsiz oyun meydançaları tikilmişdir. Cari ilin sonunadək daha 10 kənddə belə meydançaların tikintisi nəzərdə tutulur.
