Braziliyanın “İRS-Herança” jurnalı Humanitar Forumun əhəmiyyətindən yazır
Bakı, 8 yanvar, AZƏRTAC
Braziliyada portuqal dilində nəşr olunan “İRS-Herança” jurnalının növbəti buraxılışında Rio de Janeyro Federal Universitetinin rektoru, professor Karlos Levinin 2014-cü il oktyabrın 2-3-də keçirilmiş IV Bakı Beynəlxalq Humanitar Forumu haqqında məqaləsi dərc edilib.
Azərbaycanın Braziliyadakı səfirliyindən AZƏRTAC-a bildirilib ki, Forumda iştirak etmək üçün ölkəmizə ilk dəfə səfər etdiyini yazan Karlos Levi Azərbaycanda gördüklərindən çox təəssüratlandığını vurğulayır. O, Braziliya ilə Azərbaycan arasında əməkdaşlığın yaxşı perspektivlərinin olduğunu qeyd edir.
Rektor Bakı Forumunun əhəmiyyətini vurğulayaraq, bu mötəbər tədbirin mühüm müzakirələrin meydanına çevrildiyini, irəli sürülən konkret təkliflərin mədəniyyətlərarası dialoqa töhfə verdiyini və aktual mövzular üzrə davamlı fikir mübadiləsinin aparıldığını diqqətə çatdırır.
Forumun rəsmi açılış mərasiminin keçirildiyi Heydər Əliyev Mərkəzinin gözəl memarlıq xüsusiyyətlərinə diqqət yetirən müəllif bu Mərkəzin dünyada Bakının məşhur simvolu kimi tanındığını qeyd edib.
Karlos Levi Azərbaycanın sürətlə müasirləşməsindən və ölkə iqtisadiyyatının dinamik inkişafından valeh olduğunu vurğulayır.
Müəllif Azərbaycan və Braziliya arasında bir sıra oxşarlıqların olduğunu yazır, təhsil sahəsində əməkdaşlıq üçün böyük potensialın mövcudluğunu qeyd edir. O, Azərbaycana səfəri zamanı Rio de Janeyro Federal Universiteti ilə Bakı Dövlət Universiteti arasında birgə layihələrin həyata keçirilməsi üçün faydalı dialoqun baş tutduğunu da diqqətə çatdırır.
Bölmənin digər xəbərləri
