Brijit Barej: Fransanın azadlığı uğrunda həyatından keçən azərbaycanlı partizanlara borcluyuq
Paris, 28 oktyabr, AZƏRTAC
Azərbaycanın Fransadakı səfirinin Rodez, Montoban şəhərlərində uyuyan Fransanın azadlığı uğrunda partizan hərəkatında həlak olmuş azərbaycanlı partizanların xatirəsini yad etmək üçün bu regiona səfəri iki ölkə arasında tarixi əlaqələri yenidən canlandırır və möhkəmləndirir. Azərbaycan əsgərləri Fransanın nasistlərdən azad edilməsində yaxından iştirak edərək həlak olublar. Fransanın azadlığı uğrunda həyatından keçən azərbaycanlı partizanlara minnətdarıq və onlara borcluyuq.
Bu fikirləri Tarn və Qaron departamentinin mərkəzi şəhəri Montobanın meri Brijit Barej AZƏRTAC-a müsahibəsində söyləyib. Mer qeyd edib ki, Kabertat Partizan Hərəkatı Üçüncü Qusar Polkunun sıralarında döyüşmüş azərbaycanlı partizanların da uyuduğu bu məkanda keçmişin, indiki zamanın və gələcəyin birləşməsini görməkdən çox şaddır. Bura keçmişlə bu günü birləşdirir, xatirələri təzələyir, partizanların ruhunu şad edir.
“Əminəm ki, ölkələrimiz arasında yeni iqtisadi, turistik körpünün əsasını qoyuruq. İqtisadi sahədə əlaqələrimizin inkişafı hər iki ölkədə yeni sahibkarların, məşğulluğun yaranmasına və həyat şəraitinin yüksəlməsinə xidmət edəcək”, - deyə B. Barej bildirib.
O, bu gün bütün insanların sülh və tərəqqi şəraitində yaşamaq istədiyini vurğulayaraq, Montoban ilə əməkdaşlığın hər iki tərəfin inkişafına xidmət edəcəyinə inandığını deyib.
Şəhla Ağalarova
AZƏRTAC-ın xüsusi müxbiri
Montoban
Bölmənin digər xəbərləri
