Britaniyada radikal sağçı qruplar həftəsonu 15-ə yaxın aksiya keçirməyi planlaşdırır
London, 2 avqust, AZƏRTAC
İngiltərənin Sautport şəhərində 17 yaşlı gəncin rəqs məktəbində uşaqları bıçaqlaması hadisəsinə etiraz olaraq radikal sağçı qruplar həftəsonu 15-ə yaxın aksiya keçirməyi planlaşdırır.
AZƏRTAC xəbər verir ki, etirazların Sautport, Lids və Bristol kimi bölgələrdə keçirilməsi planlaşdırılır. Sosial şəbəkələrdə aksiyalarla bağlı elanlar yerləşdirilib, təşkilatçılar iştirakçıları İngiltərə bayraqları gətirməyə və “Kifayətdir!”, “Uşaqlarımızı xilas edin!”, “Qayıqları dayandırın!” kimi şüarların əks olunduğu plakatlar gətirməyə çağırıblar.
Bir neçə gün əvvəl isə bəzi radikal sağçı qruplar Britaniya Baş nazirinin iqamətgahı qarşısında aksiya keçirib. Etirazçılar iqamətgahın qapılarına yanan maddələr atıblar. Hadisə nəticəsində 100-ə yaxın etirazçı saxlanılıb. Baş nazir Kir Starmer ölkədə xaos törədənləri qınayıb.
Qeyd edək ki, iyulun 29-da Sautport şəhərində 17 yaşlı bıçaqlı şəxs şəhərdəki rəqs məktəblərindən birində uşaqlara hücum edib. Nəticədə 9 uşaq yaralanıb, 3 uşaq isə aldığı zərbələrdən xəstəxanada həyatını itirib. İyulun 30-da Sautport şəhərində qurbanların xatirəsini yad etmək üçün keçirilən anım mərasimində isə bir qrup şəxs və polis arasında qarşıdurma yaranıb. Bıçaqlanma hadisəsindən zərərçəkən ailələr etirazçıları qınayıblar.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
