BSU Çinin ali təhsil ocaqları ilə əlaqələrini genişləndirir VİDEO
Pekin, 1 iyun, AZƏRTAC
Bakı Slavyan Universitetinin (BSU) rektoru Anar Nağıyevin rəhbərliyi ilə nümayəndə heyəti Çin Xalq Respublikasına səfər edib.
AZƏRTAC xəbər verir ki, səfər çərçivəsində Çinin nüfuzlu ali təhsil ocaqlarından olan və dünyada xarici dillərin tədrisi üzrə qabaqcıl universitetlər sırasında yer alan Pekin Xarici Dillər Universitetinin (PXDU) rəhbərliyi ilə keçirilən görüşdə əməkdaşlıq məsələləri müzakirə olunub. Qeyd edilib ki, son illər dövlət başçıları – İlham Əliyev və Si Cinpinin strateji baxışları ilə istiqamətlənən ikitərəfli münasibətlər sürətlə inkişaf edərək, hərtərəfli strateji tərəfdaşlıq səviyyəsinə yüksəlib. Bu, hər iki ölkənin bütün sahələrdə, o cümlədən elm və təhsil sahəsində əməkdaşlığının daha da irəli aparılması və zənginləşdirilməsi üçün imkanlar yaradıb. Bu xüsusda Bakı Slavyan Universiteti ilə Pekin Xarici Dillər Universiteti arasında dillərin, xüsusən də PXDU-da Azərbaycan dilinin, BSU-da isə Çin dilinin tədrisi sahəsində əməkdaşlıq, o cümlədən müəllim və tələbə mübadiləsinin mümkünlüyü vurğulanıb.
Ötən il Azərbaycana səfərinin məhsuldar keçdiyini qeyd edən prorektor Gao Qanq Azərbaycanda Çin dilinə marağın şahidi olduğunu, təmsil etdiyi universitetin Azərbaycanın bir neçə ali təhsil ocağı, habelə Azərbaycan Milli Elmlər Akademiyası, Heydər Əliyev Fondu ilə sıx əməkdaşlıq etdiyini bildirib.
Rektor Anar Nağıyev BSU-da tədris olunan dillərin sayının çoxaldılması istiqamətində aparılan işlərdən danışıb, bu sırada Çin dilinin tədrisinin təşkilinə böyük önəm verdiklərini diqqətə çatdırıb. A.Nağıyev tərəflərin müasir texnologiyaların tətbiqi, o cümlədən süni intellekt (AI), ortaq nəşrlərin hazırlanması, yay məktəblərinin təşkili sahəsində də əməkdaşlığın perspektivlərinə toxunub.
Görüşdə BSU PXDU-nun təşəbbüsü ilə yaradılan və 20 ölkədən 40-a yaxın ali təhsil ocağını birləşdirən Xarici Dillər Universitetlərinin Qlobal Alyansına qoşulmağa dəvət olunub. BSU-nun nümayəndə heyəti PXDU-nun Asiya fakültəsinin Azərbaycan dili kafedrasına, habelə süni intellekt və insan dili laboratoriyasına, xarici dil təhsili tədqiqat mərkəzinə baş çəkib.
Çinin pedaqoji ali təhsil üzrə qabaqcıl təhsil ocaqlarından olan Pekin Pedaqoji Universitetində keçirilən görüşdə əməkdaşlıq məsələləri, xüsusən də xarici dillər üzrə pedaqoji təhsilin təşkilinə dair əməkdaşlıq imkanları, müəllim və tələbə mübadiləsi, yay məktəblərinin təşkili, ortaq araşdırma və konfransların təşkili məsələləri müzakirə edilib. Sonra nümayəndə heyəti Pekin Pedaqoji Universitetinin Rəqəmsal təhsil resursları mərkəzi ilə tanış olub.
BSU-nun nümayəndə heyəti Çinin Cıcian əyalətindəki Hucou Pedaqoji Universitetində də olub, əməkdaşlıq məsələlərini müzakirə edib. Tərəflər arasında əməkdaşlığa dair müqavilə imzalanıb.
Bölmənin digər xəbərləri
