Xidmət innovativ yeniliklərin tətbiqini, elektron xidmətlərin sayının və keyfiyyətinin artırılmasını daim diqqətdə saxlayır

Bakı, 19 mart, AZƏRTAC

Martın 19-da Dövlət Miqrasiya Xidmətinin yaradılmasının19 ili tamam olur.

AZƏRTAC xəbər verir ki, Prezident İlham Əliyevin 2007-ci il 17 mart tarixli Sərəncamı ilə hər il martın 19-u Azərbaycan Respublikası miqrasiya orqanları işçilərinin peşə bayramı günü kimi qeyd olunur.

Dövlət Miqrasiya Xidməti Prezident İlham Əliyevin diqqət və qayğısı ilə daim əhatə olunub və ölkəmizdə müasir tələblərə cavab verən Xidmət formalaşdırılıb. Prezident İlham Əliyev son illərdə miqrasiya proseslərinin vahid dövlət siyasəti ilə tənzimlənməsi sahəsində kompleks tədbirlərin həyata keçirilməsini təmin edib. Dövlətimizin başçısı bu istiqamətdə mühüm addımlarından biri kimi 2006-cı ildə “Azərbaycan Respublikasının Dövlət Miqrasiya Proqramının təsdiq edilməsi haqqında” Sərəncam imzalayıb. Dövlət Proqramında miqrasiya idarəetmə sisteminin inkişafı, miqrasiya proseslərinin tənzimlənməsi, bu sahədə qanunvericiliyin beynəlxalq normalara və müasir dövrün tələblərinə uyğun təkmilləşdirilməsi, qanunların tətbiqinin səmərəliliyinin təmini, miqrasiya müasir avtomatlaşdırılmış nəzarət sisteminin yaradılması, qeyri-qanuni miqrasiyanın qarşısının alınması kimi önəmli məsələlər yer alıb. Dövlət Proqramı əsasında miqrasiya sahəsində vahid dövlət siyasətini həyata keçirən xüsusi dövlət orqanının yaradılması da obyektiv zərurət kimi meydana çıxıb. Bununla əlaqədar olaraq Prezident İlham Əliyev 2007-ci il martın 19-da Dövlət Miqrasiya Xidmətinin yaradılması haqqında Fərman imzalayıb. Miqrasiya sahəsində dövlət siyasətini, habelə miqrasiya proseslərinin idarə edilməsində və tənzimlənməsində qanunvericiliklə müəyyənləşdirilmiş səlahiyyətləri həyata keçirən Dövlət Miqrasiya Xidmətinə hüquq-mühafizə orqanı statusu verilib.

Dövlət Miqrasiya Xidmətinin strukturuna aparatla yanaşı, 9 regional miqrasiya baş idarəsi (idarəsi), əcnəbilərin və vətəndaşlığı olmayan şəxslərin istifadəsi üçün Bakı, Naxçıvan və Yevlaxda olmaqla 3 müvəqqəti yerləşdirmə mərkəzi, Təlim-tədris mərkəzi və tibb müəssisəsi daxildir. Bundan başqa, Azərbaycanın dövlət sərhədindən buraxılış məntəqələrində, o cümlədən beynəlxalq hava limanlarında Dövlət Miqrasiya Xidmətinin bölmələri fəaliyyət göstərir.

2008-ci il dekabrın 1-dən Dövlət Miqrasiya Xidmətinin üç dildə fəaliyyət göstərən 919 - Çağrı Mərkəzi yaradılıb. Mərkəzin fəaliyyəti tamamilə yenidən qurulub, texniki imkanları genişləndirilməklə xidmətin keyfiyyəti beynəlxalq standartlara uyğunlaşdırılıb.

Ötən il ərzində Dövlət Miqrasiya Xidmətinə əcnəbilər və vətəndaşlığı olmayan şəxslər tərəfindən müvəqqəti olma müddətinin uzadılması, müvəqqəti və daimi yaşamaq üçün icazələrin alınması, vətəndaşlığa qəbul, bərpa, vətəndaşlıqdan çıxma, eləcə də vətəndaşlıq mənsubiyyətinin və qaçqın statusunun müəyyənləşdirilməsi, həmçinin əmək fəaliyyətinin həyata keçirilməsi üçün iş icazəsinin alınması və müddətinin uzadılması ilə bağlı 452 mindən çox müraciət daxil olub.

Miqrasiya sahəsində beynəlxalq əməkdaşlıq daha da genişlənir

Son dövrdə Azərbaycanın miqrasiya sahəsində beynəlxalq əməkdaşlığı daha da genişlənir. Ötən illərdə beynəlxalq əməkdaşlığın ikitərəfli və çoxtərəfli əsaslarla inkişaf etdirilməsi və möhkəmləndirilməsi, o cümlədən müqavilə hüquq bazasının genişləndirilməsi məqsədilə məqsədyönlü addımlar atılıb. Dövlət Miqrasiya Xidməti son 19 ildə müxtəlif beynəlxalq təşkilatların, ölkəmizdə fəaliyyət göstərən diplomatik nümayəndəliklərin, müvafiq dövlət orqanlarının, habelə Azərbaycanda olan, yaşayan, işləyən əcnəbilərin etibarlı tərəfdaşına çevrilib.

Belə ki, Azərbaycanın Mərkəzi Asiya regionunda beynəlxalq miqrasiya və qaçqınların müdafiəsi üzrə regional məşvərətçi platforma olan Almatı Prosesinə sədrliyinin yekunu olaraq ötən ilin aprelində Bakıda Prosesin 3-cü Nazirlər Konfransı keçirilib. Tədbir nəticəsində Azərbaycan tərəfindən Almatı Prosesində iştirak edən tərəflərlə məsləhətləşmələr çərçivəsində hazırlanmış və miqrasiyanın regional inkişafa töhfələrinin artırılması, iqlim dəyişmələrinin insanların yerdəyişməsinə mənfi təsirlərinin azaldılması, habelə miqrasiya üzrə məlumat mübadiləsinin genişləndirilməsi üçün əməkdaşlığı təşviq edən Bakı Bəyannaməsi qəbul edilib.

Azərbaycan, həmçinin BMT-nin Miqrasiya Şəbəkəsinin dəvəti ilə Cənub-Şərqi Avropa, Şərqi Avropa və Mərkəzi Asiya regionu üzrə “Çempion ölkələr” təşəbbüsünə qoşulan birinci ölkədir. Qeyd edək ki, bu təşəbbüs BMT-nin Miqrasiya Şəbəkəsi tərəfindən 2020-ci ilin sentyabrında təsis olunub.

Əməkdaşların peşə hazırlığı artırılır

Ötən 19 ildə idarəetmənin təkmilləşdirilməsi, əməkdaşların peşə hazırlığının yüksəldilməsi, normativ hüquqi və maddi-texniki bazanın yaradılması istiqamətində əməli tədbirlər görülüb. Xalqımıza, dövlətimizə, dövlətçiliyimizə sədaqətlə xidmət edən Dövlət Miqrasiya Xidmətinin əməkdaşları qarşıya qoyulmuş tapşırıqları uğurla yerinə yetiriblər. Ölkəmizdə keçirilən mötəbər beynəlxalq tədbirlərdə xidmətin qarşısına qoyulmuş tapşırıqların icrası təmin edilib. Ali diqqət və qayğı, eyni zamanda, ciddi nəzarət sayəsində Dövlət Miqrasiya Xidmətinin qarşıya qoyulan, qanunvericiliklə üzərinə düşən vəzifələrin öhdəsindən gələ bilən mobil bir quruma çevrilib.

Dövlət Miqrasiya Xidməti 19 illik fəaliyyətində daim dövlətimizin başçısının fərman və sərəncamlarını, tapşırıqlarını, tövsiyələrini rəhbər tutur, göstərilən yüksək diqqət və qayğının müqabilində işini ən müasir tələblər səviyyəsində qurmağa çalışır. Bu illərdə qurum formalaşıb, güclənib, daha da inkişaf edib. Xidmət pandemiya dövründə bütün zəruri tədbirlər görməklə yanaşı, postpandemiya dövründə əsas fəaliyyət istiqamətlərini müəyyənləşdirib.

Xidmətin təşkilatçılığı ilə əcnəbilər və vətəndaşlığı olmayan şəxslər üçün maarifləndirici görüşlər keçirilir. Miqrasiya qanunvericiliyi ilə bağlı Dövlət Miqrasiya Xidmətinin regional miqrasiya baş idarələrinin (idarələrinin) əhatə etdiyi rayon və şəhərlərdə çoxsaylı maarifləndirmə-məlumatlandırma tədbirləri, səyyar xidmətlər təşkil edilir. Azərbaycana gələn əcnəbi və vətəndaşlığı olmayan şəxslərə müvafiq yaşama icazələrinin verilməsi prosedurları və qanunsuz miqrasiyaya qarşı mübarizəyə həsr olunan tədbirlər keçirilir.

Elektron xidmətlər üzrə yenilənmə işləri aparılıb

Dövlət Miqrasiya Xidməti innovativ yeniliklərin tətbiqi, elektron xidmətlərin sayının və keyfiyyətinin artırılması, habelə onlardan istifadənin daha da sadələşdirilməsini daim diqqətdə saxlayır. Ötən dövrdə Dövlət Miqrasiya Xidməti tərəfindən e-xidmətlərin geniş tətbiqi, onların sayının və keyfiyyətinin artırılması, vətəndaşların xidmətlərdən məmnunluğunun yüksəldilməsi məqsədilə bütün elektron xidmətlər üzrə yenilənmə işləri aparılıb. Bundan başqa, ötən il daha bir yenilik– Yüksəkixtisaslı Miqrant Portalı yaradılıb. www.pass.gov.az ünvanı ilə təqdim olunan portal iştirakçıların müraciətlərinin qəbulunu və cavablandırılmasını “bir pəncərə” prinsipi əsasında təmin edir.

Dövlət Miqrasiya Xidməti sosial layihələrin reallaşdırılmasını da diqqət mərkəzində saxlayır. Şəhid və qazi ailələri ilə bağlı tədbirlər, “Miqrasiya Könüllüsü” İctimai Birliyi, “Miqrasiya Məktəbi” layihəsi, əcnəbi və qaçqın statusu əsasında yaşayan aztəminatlı ailələrə istiqamətlənən fəaliyyət və digər sosial layihələr, təlimlər həyata keçirilir.

“ASAN Xidmət indeksi” üzrə mükafatlandırılma

Bu ilin fevralında Dövlət Miqrasiya Xidməti “ASAN Xidmət indeksi” üzrə qiymətləndirmə nəticələrinə dair təqdimatda ən yüksək göstəriciyə - 96,83 faizə malik olmaqla mərkəzi icra hakimiyyəti orqanları arasında birinci yeri tutub. Xidmət 2016-cı ildən qiymətləndirmə prosesinə qoşulmaqla bu müddət ərzində xidmət keyfiyyətinin artırılması istiqamətində görülmüş işlər nəticəsində mərkəzi icra hakimiyyəti orqanları arasında 5 dəfə birinci yerə layiq görülüb. Xatırladaq ki, qiymətləndirilmənin keçirilməsində əsas məqsəd dövlət xidmətləri haqqında məlumatların vahid mənbədə toplanması və sistemləşdirilməsi, xidmətlərin göstərilməsində təkrarlığın aradan qaldırılması və yeni növ xidmətlərin yaradılması yolu ilə bu sahədə idarəetmənin çevikliyinin təmin edilməsi, xidmətlər üzrə təhlil və proqnozlaşdırma imkanlarının artırılmasıdır.

Dövlət Miqrasiya Xidmətində vətəndaşlara göstərilən xidmətlərin şəffaf və keyfiyyətlə həyata keçirilməsi, vətəndaş məmnunluğunun və rahatlığının təmin olunması prioritet məsələ kimi diqqət mərkəzində saxlanılır. Xidmətdə əcnəbilər və vətəndaşlığı olmayan şəxslər tərəfindən daxil olan müraciətlər qanunvericiliyin tələblərinə uyğun olaraq araşdırılır və müvafiq qərarlar qəbul edilir. İnzibati prosedurların minimuma endirilməsi, elektronlaşmanın geniş təşviqi, müraciət edən əcnəbilərin və vətəndaşlığı olmayan şəxslərin sənəd qəbulunun optimallaşdırılması, icazə prosedurunun sadələşdirilməsi həyata keçirilir.

Əcnəbilərin və vətəndaşlığı olmayan şəxslərin, əməkçi miqrantların, o cümlədən qaçqınların hüquqlarının qorunması, inteqrasiya yolu ilə cəmiyyətin inkişaf prosesinə cəlb edilməsi məsələləri hər zaman Azərbaycan dövlətinin diqqətindədir. Müxtəlif dinlərin və xalqların nümayəndələrinin birlikdə sülh şəraitində yaşadığı ölkəmizdə miqrasiyanın idarə edilməsi, miqrantların cəmiyyətə inteqrasiyası, onların rifahı, hüquq və azadlıqlarının müdafiəsi istiqamətində Dövlət Miqrasiya Xidməti tədbirlər həyata keçirir. Həmin tədbirlər bərabərliyin, müxtəlifliyin və inklüzivliyin təşviqi ilə miqrantların cəmiyyətə səmərəli inteqrasiyasına, onların hüquqlarının müdafiəsinə diqqətin artırılmasına, eləcə də miqrasiya sahəsində yerli və beynəlxalq təşkilatlarla əməkdaşlığın daha da dərinləşməsinə mühüm töhfə verir.