Bu gün Ermənistanın hərbi gücünü Azərbaycanla müqayisə etmək belə gülüncdür - AÇIQLAMA
Bakı, 13 sentyabr, AZƏRTAC
Azərbaycan Ordusu Ermənistan ordusunun döyüş potensialı, mənəvi-psixoloji vəziyyəti, hazırlığı baxımından Ordumuzla qətiyyətlə müqayisə oluna bilməz. Digər tərəfdən isə Azərbaycan Ordusu Vətən müharibəsi başa çatdıqdan sonra da Türk ordu modelinə keçid nəticəsində təcavüzkar ölkənin ordusundan daha üstün səviyyədədir. Yeni quru qoşunları komandanlığı və bir neçə komanda hərbi hissəsi yaradılıb.
Bu fikirləri hərbi ekspert Ədalət Verdiyev AZƏRTAC-a açıqlamasında deyib.
Onun sözlərinə görə, gələcəkdə həmin proses komanda hərbi hissələrinin sayının artırılması ilə müşayiət olunacaq. Bu gün Şərqi Zəngəzurda, eyni zamanda, Ermənistanla şərti sərhəddə və Qarabağda Rusiya sülhməramlı qüvvələrinin müvəqqəti məsuliyyət zonasının perimetri boyunca kifayət qədər hərbi hissələrimiz minimal reaksiya müddətini təmin etmək məqsədilə yerləşdirilib. Başqa sözlə desək, bu gün Ermənistanla Azərbaycan Ordusunu müqayisə etmək belə gülünc olar. Beynəlxalq reytinqlərdə iki ölkənin orduları arasında təxminən iki dəfə fərq var.
Ədalət Verdiyev qeyd edib ki, Vətən müharibəsində Ermənistan ordusu müxtəlif silah sistemləri, xüsusilə də zirehli tanklarını və vasitələrini itirdi. Şəxsi heyət baxımından isə Ermənistanın itkiləri fərarilərlə birlikdə 20 mindən çoxdur. Qarabağ ərazisində indiyədək qalmaqda olan 10 min nəfərlik kontingentin müqavimət göstərmək potensialını tamamilə itirdiyini nəzərə alsaq, onları da ötən ilin martından sonrakı dövrdə fərarilər sırasına əlavə edə bilərik. Hər halda Azərbaycanın qarşısında Ermənistanın fərari ordusunun kifayət qədər zəif, cılız və köməksiz vəziyyətdə qalmasını müşahidə etməkdəyik. Ölkəmiz isə müharibədən sonrakı dövrdə həm savaşda sərf etdiyi silah və sursat arsenalını bərpa edib, həm də ənənəvi tərəfdaşları olan İsrail və Türkiyə ilə əməkdaşlığını daha üstün səviyyəyə qaldırıb. Zəruri hesab edilən bütün silah sistemləri üzrə müqavilələrin tam həcmdə yerinə yetirilməsinə nail olub.
“Son təxribatlarda Azərbaycan tərəfindən olan videogörüntülər görsətdi ki, ordumuzun əsgərləri Ermənistanın dərinliyinədək hər şeyi görə bilirlər. Ermənistanın 850 yaşayış məntəqəsindən 400-ü Azərbaycanla sərhəddə yerləşir. Təxminən 300 yaşayış məntəqəsi optik elektron müşahidə sistemləri olmadan əsgərimizin gözü önündədir.
Digər tərəfdən sərhəddə baş verən təxribatların törədilməsinə yalnız Ermənistan qərar vermir. Çünki bu ölkəni digər xarici qüvvələr də kənardan idarə edir və onların dediyi ilə Ermənistan Azərbaycana qarşı hərbi və siyasi təxribatlar etməyə çalışır. Xatırladım ki, İkinci Qarabağ müharibəsindən əvvəl Azərbaycan Prezidenti İlham Əliyev deyirdi ki, Qarabağ münaqişəsinin müharibə yolu ilə həlli var. Amma dünyada bəzi qüvvələr bildirirdi ki, bunun hərbi yolla həlli yoxdur. Sonralar Azərbaycan tərəfi Laçın sərhəd-buraxılış məntəqəsinin qurulacağını, Ağdam-Xankəndi yolunun işləyəcəyini dedi. Amma bəzi xarici qüvvələr buna qarşı çıxdılar. Lakin həmin məntəqə yaradıldı və yol işlədi. Yəni Azərbaycan tərəfi nə deyirsə, onu icra edir və bununla dünyada artıq razılaşırlar”, - deyə hərbi ekspert vurğulayıb.
Bölmənin digər xəbərləri
