DÜNYA
Bu il İtaliyaya gələn turistlərin sayı kəskin azalıb
Roma, 29 dekabr, AZƏRTAC
Koronavirus pandemiyası ilə əlaqədar İtaliyaya gələn turistlərin sayı kəskin şəkildə aşağı düşüb. Ötən ilin yanvar-sentyabr ayları ilə müqayisədə bu ilin müvafiq dövründə İtaliyaya səfər edən turistlərin sayı 69 faiz azalıb.
AZƏRTAC xəbər verir ki, bu barədə məlumatı İtaliya Statistika İdarəsi (İstat) yayıb. Dövlət qurumunun hesabatında pandemiyanın ölkənin əsas gəlir mənbələrindən biri olan turizm sektorunda sarsıdıcı şok effekti yaratdığı qeyd edilib. Eyni zamanda, ölkədaxili turizmin səviyyəsinin aşağı düşdüyü bildirilib.
2020-ci ildə İtaliyaya səfər edən turistlərin əksəriyyəti (47 faiz) almanlar olub. Amerikanlar isə bu il İtaliyanı demək olar ki, səyahət proqramından çıxarıblar və ötən illə müqayisədə 95 faiz azalma olub.
Turistlərin sayı şəhər turizmində xüsusilə aşağı düşüb (71 faiz azalma). Yaz aylarında sərt karantin qaydaları tətbiq etməyə məcbur olan İtaliyada yay mövsümündə həyata keçirilən yumşaldılmalar Aralıq dənizi sahillərində turistlərin sayını artırsa da, payıza doğru infeksiya hallarının artımı məhz yay aylarındakı yumşaldılma ilə izah olunur.
Qeyd edək ki, təxminən 60 milyon əhalisi olan İtaliyada indiyədək 2,1 milyon nəfər koronavirusa yoluxub, bu virusdan ölənlərin sayı isə 72 min nəfərdən çoxdur.
Elgün Niftəli
AZƏRTAC-ın xüsusi müxbiri
Roma
Bölmənin digər xəbərləri
