Budapeşt yarımmarafonunda rekord sayda atlet iştirak edib
Budapeşt, 7 sentyabr, AZƏRTAC
Macarıstanın paytaxtı Budapeştdə keçirilən 41-ci “Wizz Air Budapeşt Yarımmarafonu” iştirakçı sayına görə rekord qırıb.
AZƏRTAC xəbər verir ki, yarışda 24 000-dən çox atlet qeydiyyatdan keçərək əvvəlki ilin göstəricisini üstələyib.
Yarışda dünyanın 117 ölkəsindən idmançılar iştirak ediblər. Təşkilatçıların məlumatına görə, xaricdən 8449 nəfər qeydiyyatdan keçib, onlardan 7330 nəfəri məhz yarımmarafon məsafəsində yarışıb. Yarış Pazmani Peter sahilboyu prospektindən start götürüb, lakin izdihamın böyüklüyü ilə bağlı start prosesi təxminən 50 dəqiqə davam edib.
21,1 kilometrlik ənənəvi yarımmarafonla yanaşı, 10 kilometrlik məsafədə də yarış keçirilib. Tədbir çərçivəsində Macarıstanın yarımmarafon üzrə çempionatı da baş tutub, kişilər arasında Qabor Karşai, qadınlar arasında isə Lili Anna Vindiç-Tot öz titullarını qoruyub saxlayıb. Qaliblərə təqdim olunmaq üçün ümumilikdə iki tondan çox medal hazırlanıb, onların dizaynında Budapeştin konturu və Dunay çayı əks olunub. Təşkilatçıların sözlərinə görə, xarici atletlərin sayı pandemiyaöncəsi dövrlə müqayisədə təxminən 300 faiz artıb ki, bu da yarışı Avropanın payız qaçış təqviminin mühüm hadisəsinə çevirib.
Bölmənin digər xəbərləri
