“CABBAR HƏŞİMOV” TANKERİ İSTİSMARA VERİLMİŞDİR
Oktyabrın 9-da Bakı Dəniz Limanında “Cabbar Həşimov” tankeri istismara verilmişdir.
Azərbaycan Prezidenti İlham Əliyev mərasimdə iştirak etmişdir.
Gəminin kapitanı Canəli Ağalarov dövlətimizin başçısına məruzə etdi: “Möhtərəm cənab Prezident, Tatarıstanın Zelenedol şəhərində inşa olunmuş “Cabbar Həşimov” gəmisi Bakı limanına gətirilmiş və istismara hazırdır”.
Dövlət Xəzər Dəniz Gəmiçiliyinin rəisi Aydın Bəşirov məlumat verdi ki, hazırda ölkəmizdə neft və neft məhsulları daşıyan 13 gəmi vardır. Tatarıstanın Zelenedol tərsanəsində tikilmiş bu gəmi də müasir standartlara cavab verir. 150 metr uzunluğu, 17,3 metr eni olan gəminin tam yükgötürmə qabiliyyəti 12 min tondur. İlkin mərhələdə gəmi Xəzər hövzəsində işləyəcəkdir. Texniki cəhətdən beynəlxalq standartlara tam uyğun olan gəminin idarə edilməsi avtomatlaşdırılmışdır. Gəminin əsas özəlliklərindən biri də bütün yük əməliyyatlarının kapitan körpüsündən idarə olunmasıdır.
Ən müasir naviqasiya sistemi ilə təchiz olunmuş tankerdə neft və neft məhsullarının daşınması üçün ən son metodlar tətbiq edilir. Bütün ekstremal vəziyyətlərə hazır olan gəmi yüksək təhlükəsizlik sisteminə malikdir. Gəmi heyətinin fəaliyyəti üçün bütün şərait yaradılmışdır.
Prezident İlham Əliyev kapitan körpüsü ilə tanış oldu. Bildirildi ki, yüksək standartlara cavab verən avadanlığın quraşdırıldığı kapitan körpüsündə müasir idarəetmə mərkəzi yaradılmış və bütün sistem kompyuter texnologiyasına əsaslanır. Radarlar hərəkət istiqamətindəki bütün ölçülərdən olan qurğuların və gəmilərin koordinatlarını, sürətini və istiqamətini müəyyən etməyə imkan verir.
Dövlətimizin başçısı tankerin istismara verilməsini bildirən düyməni basdı, heyətə uğurlar arzuladı və müvafiq tövsiyələrini bildirdi.
######
 |
 |
 |
Bölmənin digər xəbərləri
